စစ်ကိုင်းတိုင်းဒေသကြီးသတင်းများ

ပထမအကြိမ် စစ်ကိုင်းတိုင်းဒေသကြီးလွှတ်တော် အထူးအစည်းအဝေး(၂/၂၀၁၅) ပထမနေ့ စတင် ကျင်းပ

Slide3

ပထမအကြိမ် စစ်ကိုင်းတိုင်းဒေသကြီး လွှတ်တော် အထူးအစည်းအဝေး(၂/၂၀၁၅) ပထမနေ့ အခမ်းအနားကို ဒီဇင်ဘာလ(၂)ရက်နေ့ နံနက်(၁၀)နာရီအချိန်က စစ်ကိုင်း တိုင်းဒေသကြီး လွှတ်တော် အဆောက်အဦးသစ် လွှတ်တော်ခန်းမတွင် စတင် ကျင်းပလျက် ရှိကြောင်း သိရသည်။

အစည်းအဝေးတွင် လွှတ်တော်ကိုယ်စားလှယ်(၄)ဦးမှ ကြယ်ပွင့်ပြမေးခွန်း(၆)ခုကို မေးမြန်းရာ သက်ဆိုင်ရာ တိုင်းဒေသကြီးအဆင့် အဖွဲ့အစည်းဝင်များမှ ပြန်လည်ဖြေကြားခြင်း၊ စစ်ကိုင်းတိုင်းဒေသကြီး၏ ဘဏ္ဍာရန်ပုံငွေပါ ဌာန၊ အဖွဲ့အစည်း(၉)ခု၏ ၂၀၁၅-၂၀၁၆ ဘဏ္ဍာရေးနှစ်၊ ငွေလုံးငွေရင်း အသုံးစရိတ် ခေါင်းစဉ်ပြောင်းသုံးစွဲခြင်းနှင့် စစ်ကိုင်းတိုင်း ဒေသကြီး၏ ၂၀၁၆-၂၀၁၇ ဘဏ္ဍာရေးနှစ် တိုင်းဒေသကြီး၏ မူလဘဏ္ဍာရန်ပုံငွေ ( RE )တွင် ပါဝင်သော ဌာန၊ အဖွဲ့အစည်းများ၏ ဘဏ္ဍာငွေအရ အသုံး ခန့်မှန်းခြေငွေစာရင်းများအား အတည်ပြုပေးနိုင်ရန် လွှတ်တော်သို့ တင်သွင်းခြင်းများ ဆောင်ရွက်ခဲ့ကြသည်။

လွှတ်တော် အစည်းအဝေးသို့ တိုင်းဒေသကြီးဝန်ကြီးချုပ် ဦးသာအေး၊ တိုင်းဒေသကြီး လွှတ်တော်ဥက္ကဌ ဦးသင်းလှိုင်၊ ဒုတိယဥက္ကဌ နှင့် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီး တရားလွှတ်တော် တရားသူကြီးချုပ်၊ တိုင်းဒေသကြီး ဥပဒေချုပ်၊ တိုင်းဒေသကြီးစာရင်းစစ်ချုပ် ၊ လွှတ်တော်ကိုယ်စားလှယ် (၈၆)ဦး တက်ရောက် ခဲ့ကြပြီး အဆိုပါ အထူးအစည်းအဝေး(၂/၂၀၁၅)အား ဒီဇင်ဘာ(၂)ရက်မှ (၄)ရက် နေ့ အထိ (၃)ရက်ကြာ ကျင်းပမည်ဖြစ်ကြောင်း သိရှိရသည်။

လူ့စွမ်းအားအရင်းအမြစ်ဖွံ့ဖြိုးမှုစွမ်းရည်မြင့်အမှတ်စဉ်(၄)နှင့်မြန်မာ့လူမှုရေးနှင့်စာပေယဉ်ကျေးမှု စွမ်းရည်မြှင့်သင်တန်းအမှတ်စဉ်(၁)သင်တန်းဆင်းပွဲများကျင်းပ

Slide37

စစ်ကိုင်းတိုင်းဒေသကြီး ဇေယျာပဒေသာဖောင်ဒေးရှင်းမှကြီးမှူးကာ ပညာအလင်းခေတ်မီစာကြည့်တိုက် ကြီးကြပ်ရေး ကော်မတီနှင့် ရှေးဟောင်းမြန်မာစာပေရေးရာဌာန ကြီးကြပ်ရေးကော်မတီတို့ပူးပေါင်းပြီး တိုင်းဒေသကြီးအတွင်းရှိ ဌာနဆိုင်ရာများမှဝန်ထမ်းများ လုပ်ငန်းစွမ်းဆောင်ရည်မြင့်မားစေရန်အတွက် (၃)လ ကြာဖွင့်လှစ်သင်ကြား လျက်ရှိသောလူ့စွမ်းအားအရင်းအမြစ်ဖွံ့ဖြိုးမှုစွမ်းရည်မြင့်အမှတ်စဉ်(၄)သင်တန်းဆင်းပွဲ၊ သင်တန်းအမှတ်စဉ် (၅)ဖွင့်ပွဲနှင့် မြန်မာ့လူမှုရေးနှင့်စာပေယဉ်ကျေးမှုစွမ်းရည်မြှင့် သင်တန်းအမှတ်စဉ်(၁)ဆင်းပွဲ၊ အမှတ်စဉ် (၂)ဖွင့်ပွဲကို နိုဝင်ဘာလ(၃ဝ)ရက်နေ့နံနက်(၉)နာရီကမုံရွာမြို့၊ မြို့တော်ခန်းမတွင်ကျင်းပရာ တိုင်းဒေသကြီး ဝန်ကြီးချုပ် ဦးသာအေးနှင့် တာဝန်ရှိသူများ၊ သင်တန်းသား၊ သင်တန်းသူ များတက် ရောက်ကြ သည်။

            အခမ်းအနားတွင် တိုင်းဒေသကြီးဝန်ကြီးချုပ် ဦးသာအေးက အမှာစကားပြောကြားပြီး သင်တန်းဆင်း လက်မှတ်များကိုလည်းကောင်း၊ တရားသူကြီးချုပ် ဦးဝင်းမြင့်၊ တိုင်းဒေသကြီးလုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်သန့်နိုင်၊ တိုင်းဒေသကြီးလူမှုရေးဝန်ကြီး ဒေါက်တာမြင့်သိန်းနှင့် တိုင်းဒေသကြီးစိုက်ပျိုးရေးနှင့် မွေးမြူရေးဝန်ကြီး ဦးစောမြင့်ဦးတို့ကသင်တန်းထူးချွန်ဆု၊စိတ်အဝင်စားဆုံးဆု၊ အတက်ကြွဆုံးဆု၊ သင်ကြား ပေးကြသည့် ဆရာ၊ ဆရာမများအား ဂုဏ်ပြုဆုများ အသီးသီးပေးအပ်ချီးမြှင့် ကြသည်။

            ထို့နောက် လူ့စွမ်းအားအရင်းအမြစ်ဖွံ့ဖြိုးမှုစွမ်းရည်မြင့်အမှတ်စဉ်(၄)မှ သင်တန်းသား၊ သင်တန်းသူများ ကိုယ်စား သင်တန်းသူ ဒေါ်ကေသွယ်မြမြဦးနှင့် မြန်မာ့လူမှုရေးနှင့်စာပေယဉ်ကျေးမှုစွမ်းရည်မြှင့် သင်တန်း အမှတ်စဉ်(၁)မှ သင်တန်းသားဦးမင်းမောင်မောင်တို့က ကျေးဇူးတင်စကားနှင့်စာတမ်းများ ပြောကြားကာ အခမ်းအနားကို ရုပ်သိမ်းလိုက်ကြောင်း သိရသည်။

            အဆိုပါသင်တန်းအား မုံရွာမြို့ ပညာအလင်းခေတ်မီစာကြည့်တိုက်တွင် လူ့စွမ်းအားအရင်းအမြစ် ဖွံ့ဖြိုးမှုစွမ်းရည်မြင့်အမှတ်စဉ်(၄)အားလည်းကောင်း၊ ရှေးဟောင်းမြန်မာစာပေရေးရာဌာနတွင် မြန်မာ့လူမှုရေးနှင့် စာပေယဉ်ကျေးမှုစွမ်းရည်မြှင့် သင်တန်းအမှတ်စဉ်(၁)တို့အားလည်းကောင်း သြဂုတ်လ(၃၁)ရက်နေ့မှ နိုဝင်ဘာလ(၃ဝ)ရက်နေ့အထိ(၃)လကြာတစ်ပတ်လျှင်(၆)ရက်၏ ရုံးချိန်ပြင်ပအချိန်များတွင် ဖွင့်လှစ်သင်ကြား ပေးခဲ့ကြောင်း သိရသည်။         

စီးပွားရေးဆိုင်ရာ အသိအမြင်များ ပိုမိုကြွယ်ဝစေရေး အခမဲ့ ဟောပြောပွဲ မုံရွာမြို့တွင် ကျင်းပပြုလုပ်

မြန်မာနိုင်ငံရှိ စီးပွားရေး လုပ်ငန်းရှင်များနှင့် စီးပွားရေးကို စိတ်ဝင်စားသူလူငယ်များ စီးပွားရေးဆိုင်ရာ အသိအမြင်ဗဟုသုတများ ပိုမို ကြွယ်ဝလာစေရန်ရည်ရွယ်၍ Hub  Myanmar  Co..,  Ltd. (Myanmar  B2B  Management   Magazine  နှင့် ACUMEN  Business  Magazine) တို့မှကြီးမှူးကာ စစ်ကိုင်းတိုင်းဒေသကြီး မုံရွာမြို့၊ မြို့တော်ခန်းမတွင် နိုဝင်ဘာလ(၂၉)ရက်နေ့ နေ့လည်(၁၂)နာရီအချိန်က ``Waves  0f  Change -  ပြောင်းလဲမှုလှိုင်း´´ ခေါင်းစဉ်ဖြင့် ဟောပြောပွဲ ကျင်းပခဲ့ကြောင်း သိရသည်။

အခမ်းအနားတွင် ရှေးဦးစွာ Hub  Myanmar  Co..,  Ltd. ၏ CEO  ဒေါက်တာထက်ဇံလင်းမှ မိတ်ဆက်စကားနှင့် ဟောပြောပွဲများ ကျင်းပရသည့် ရည်ရွယ်ချက်များကို ရှင်းလင်းပြောကြားသည်။

ဆက်လက်၍ ရန်ကုန်တက္ကသိုလ်၏ ဂုဏ်ထူးဆောင်ပါရဂူ ပါမောက္ခဆရာကြီး ဒေါက်တာ အောင်ထွန်းသက်က ``ယခု လက်ရှိအချိန်တွင် မိမိတို့အနေဖြင့် နိုင်ငံတကာရှိ စီးပွားရေး လုပ်ငန်းများနှင့် ရင်ပေါင်တန်းကာ လက်တွဲပူးပေါင်းနိုင်ရန်အတွက် အဘက်ဘက်မှ ပြောင်းလဲတိုးတက်လာမှုများကို မျက်ခြေ မပြတ်စေရန်နှင့် မိမိတို့ ဆက်စပ်လုပ်ကိုင်နေသော အဖွဲ့အစည်း တစ်ခုလုံးနှင့် ပတ်သက်သော ပြောင်းလဲ တိုးတက်မှုများကို ရည်ရွယ်သည့် ကောင်းမွန်သော ရည်မှန်းချက်များဖြင့် စီးပွားရေး တည်ဆောက်နိုင်စေရန်´´ အကြောင်းအရာများလည်းကောင်း၊ Device  Business  Management  Academy   ၏  Principal  ဦးတင်ဇံကျော်မှ `` Change  Your  Thinking   Change  Your  Life ´´ခေါင်းစဉ်ဖြင့် စိတ်ဓာတ် မြှင့်တင်ရေး ဆိုင်ရာ အသိပညာ ဗဟုသုတများကိုလည်းကောင်း အသီးသီး ဆွေးနွေး ဟောပြော ခဲ့ကြသည်။

အဆိုပါ ဟောပြောပွဲသည် ``Better   Future  Better  Myanmar  2015´´ Free   Seminar   Series  အစီအစဉ်၏ (၁၃)ကြိမ်မြောက် ဟောပြောပွဲဖြစ်ပြီး ပွဲမစခင်၌ ပွဲဖြစ်မြောက်ရေးအတွက် အဘက်ဘက်မှ ပူးပေါင်းပါဝင်ထားသော Sponsor  ကုမ္ပဏီများမှ ဟောပြောပွဲသို့ လာရောက် လေ့လာကြသူများအား ၄င်းတို့၏ ကုန်ပစ္စည်းများနှင့် ဝန်ဆောင်ဆောင်မှုများကို ခင်းကျင်းပြသ ရောင်းချခြင်း၊ စိတ်ဝင်စားသူများအား ရှင်းလင်းဖြေကြားကာ လုပ်ငန်း အချင်းချင်း ပူးပေါင်းဆောင်ရွက်ရန်တို့ကို ဆွေးနွေးခြင်းများ ပြုလုပ် ခဲ့ကြကြောင်း သိရှိရသည်။

ပိုလီယိုကာကွယ်ဆေးအသစ်များထည့်သွင်းထိုးနှံခြင်းလုပ်ငန်း အသိပညာပေးဟောပြောပွဲ ကောလင်းမြို့၌ ကျင်းပ

            စစ်ကိုင်းတိုင်းဒေသကြီး၊ ကောလင်းမြို့၌ ပိုလီယိုပုံမှန်ကာကွယ်ဆေးထိုးခြင်းလုပ်ငန်းတွင် ကာကွယ်ဆေးအသစ်များ Inactivated Polio Vaccine(IPV) စတင်ထည့်သွင်းထိုးနှံခြင်းလုပ်ငန်း အသိပညာပေးဟောပြောပွဲကို နိုဝင်ဘာ(၂၄)ရက်နေ့ နေ့လယ်(၁၂)နာရီက မြို့နယ်အထွေထွေအုပ်ချုပ်ရေးဦးစီးဌာန ၊ ဇာတိမာန်ခန်းမ၌ကျင်းပရာ   မြို့နယ်စီမံခန့်ခွဲမှုကော်မတီဥက္ကဋ္ဌ ဦးရဲမြတ်တင့်က အမှာစကားပြောကြားပြီး မြို့နယ်ကျန်းမာရေးဦးစီးဌာန မြို့နယ်ဆရာဝန်ကြီး ဒေါက်တာ ခင်မောင်သန်းက ပိုလီယိုကာကွယ်ဆေးအသစ်များ စတင်ထိုးနှံခြင်းလုပ်ငန်းများအကြောင်းကို       အသိပညာပေးဟောပြောသည်။ ထို့နောက် အခမ်းအနားသို့တက်ရောက်လာသူများက     မရှင်းလင်းသည်များကို     မေးမြန်းကြရာ မြို့နယ်ဆရာဝန်ကြီးက ပြန်လည်ရှင်းလင်းသည်။ ပိုလီယိုကာကွယ်ဆေးအသစ်များ(IPV) စတင်ထည့်သွင်းထိုးနှံခြင်းလုပ်ငန်းကို ၂၀၁၅ခုနှစ်၊ ဒီဇင်ဘာ(၁)ရက်နေ့မှ (၂)ရက်နေ့ထိ ကျေးရွာများသို့      ကွင်းဆင်းထိုးနှံပေးမည်ဖြစ်ပြီး ပုံမှန်(၅)မျိုးစပ် ကာကွယ်ဆေးထိုးနေသောကလေးများထဲမှ ဒုတိယအကြိမ်ထိုးနှံရမည့်ကလေးအား    တစ်ကြိမ်တည်း ထည့်သွင်းထိုးနှံပေးမည်ဖြစ်ကြောင်းသိရသည်။

            အဆိုပါအခမ်းအနားသို့ မြို့နယ်စီမံခန့်ခွဲမှုကော်မတီဥက္ကဌနှင့်  ဌာနဆိုင်ရာများ၊  မြို့နယ်ကျန်းမာရေးဝန်ထမ်းများ၊ ကျေးရွာအုပ်စုအုပ်ချုပ်ရေးမှူးများ၊ မြို့နယ်မိခင်နှင့်ကလေး စောင့်ရှောက်ရေးအဖွဲ့ဝင်များ၊ မြို့နယ်အမျိုးသမီးရေးရာအဖွဲ့များ တက်ရောက်ကြောင်းသိရသည်။

ပထမအကြိမ် စစ်ကိုင်းတိုင်းဒေသကြီးလွှတ်တော် အထူးအစည်းအဝေး(၂/၂၀၁၅) ဒီဇင်ဘာလဆန်းတွင် စတင်ကျင်းပမည်ဖြစ်ကြောင်းသိရ

ပထမအကြိမ် စစ်ကိုင်းတိုင်းဒေသကြီးလွှတ်တော် အထူးအစည်းအဝေး(၂/၂၀၁၅)ကို ၂၀၁၅ခုနှစ်၊ ဒီဇင်ဘာလ(၂)ရက်၊ ဗုဒ္ဓဟူးနေ့ နံနက်(၁၀)နာရီတွင် စစ်ကိုင်းတိုင်းဒေသကြီးလွှတ်တော် အဆောက် အဦး သစ် တွင် စတင်ကျင်းပမည်ဖြစ်ကြောင်း သိရှိရသည်။

            အဆိုပါ လွှတ်တော် အထူးအစည်းအဝေး(၂/၂၀၁၅)အား တက်ရောက်ရန်အတွက် လွှတ်တော် ကိုယ်စားလှယ်တွေကို နိုဝင်ဘာလ(၃၀)ရက်နေ့ထက်မစော ၊ ဒီဇင်ဘာလ(၁)ရက်နေ့ထက် နောက်မကျဘဲ  ရောက်ရှိ သတင်းပို့နိုင်ဖို့အတွက် ဖိတ်ကြားထားပြီးဖြစ်ကြောင်း၊ ယခုကျင်းပမည့် အစည်းအဝေးမှာ စစ်ကိုင်းတိုင်း ဒေသကြီးအတွင်းရှိ မဲဆန္ဒနယ်အသီးသီးမှ  လွှတ်တော်ကိုယ်စားလှယ်များ တက်ရောက်ပြီး ဒီဇင်ဘာလ(၂)ရက်နေ့မှ ဒီဇင်ဘာလ  (  ၄)နေ့အထိ (၃)ရက်ကြာ ကျင်းပသွားမည်ဖြစ်ကြောင်း သိရှိရ သည်။

စစ်ကိုင်းတိုင်းဒေသကြီး ဝန်ကြီးချုပ် ဦးသာအေး ၂၀၁၅-၂၀၁၆ ခုနှစ်၊ ဒုတိယ(၃)လပတ် လုပ်ငန်းညှိနိုင်း အစည်းအဝေး တက်ရောက်

စစ်ကိုင်းတိုင်းဒေသကြီး၂၀၁၄-၂၀၁၆ခုနှစ်၊ ဒုတိယ(၃)လပတ် လုပ်ငန်းညှိနိုင်း အစည်းအဝေးကို နိုဝင်ဘာလ (၁၉)ရက်၊ နံနက်ပိုင်းတွင် တိုင်းဒေသကြီး အစိုးရဖွဲ့ရုံး၊ အစည်းအဝေးခန်းမတွင် ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးသာအေး၊ တိုင်းဒေသကြီး လွှတ်တော်ဥက္ကဌ ဦးသင်းလိူင်၊ လွှတ်တော် ဒုတိယဥက္ကဌနှင့် တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသ ကြီး ဥပဒေချုပ်၊ စာရင်းစစ်ချုပ်နှင့် တိုင်းဒေသကြီး အဆင့်ဌာနဆိုင်ရာ အကြီးအကဲများ၊ တိုင်းဒေသကြီးအတွင်းရှိ ခရိုင်/မြို့နယ် စီမံခန့်ခွဲမှု ကော်မတီ ဥက္ကဌများ၊ နာဂကိုင်ပိုင် အုပ်ချုပ်ခွင့်ရ ဒေသနာဂဦးစီးအဖွဲ့ဝင်များ တက်ရောက်ကြသည်။

            ရှေးဦးစွာ တိုင်းဒေသကြီး ဝန်ကြီးချုပ် ဦးသာအေးက အမှာစကားပြောကြားပြီး တိုင်းဒေသကြီး အတွင်းရှိ မြို့နယ် စီမံခန့်ခွဲမှု ကော်မတီဥက္ကဌများနှင့် နာဂကိုင်ပိုင် အုပ်ချုပ်ခွင့်ရဒေသနာဂဦးစီးအဖွဲ့ဝင်များက၂၀၁၅-၂၀၁၆ ခုနှစ၊် မိမိတို့မြိုနယ်အတွင်း ဒေသ ဖွံ့ဖြိုးရေး လုပ်ငန်းများ ဆောင်ရွက်ထားရှိမှုနှင့် ဆက်လက်ဆောက်ရွက်မည့် လုပ်ငန်းများ အား အသီးသီး တင်ပြကြပြီး ခရိုင်စီမံခန့်ခွဲမှု ကော်မတီဥက္ကဌများက လုပ်ငန်းများနှင့် ပတ်သက်၍ ဖြည့်ဆွက်တင်ပြကြသည်။

            ယင်းနောက် တိုင်းဒေသကြီး အဆင့်ဌာနဆိုင်ရာများက မိမိတို့ဌာန လုပ်ငန်း များနှင့် ပတ်သက်၍ အသီးသီးတင်ပြကာ တိုင်းဒေသကြီး အစိုးရအဖွဲ့ဝင် ဝန်ကြီးများနှင့် အစည်းအဝေးသို့ တက်ရောက်လာသူများက လုပ်ငန်းများနှင့် ပတ်သက်၍ အထွေထွေ ဆွေးနွေး တင်ပြကြသည်။

            ထို့နောက် တိုင်းဒေသကြီး ဝန်ကြီးချုပ် ဦးသာအေးက၂၀၁၅-၂၀၁၆ ခုနှစ်၊ လုပ်ငန်းများနှင့်    ပတ်သက်၍   အသီးသီး  ဆွေးနွေးတင်ပြချက်များအပေါ်   လိုအပ်သည်များကိုတာဝန်ရှိသူများနှင့် ညှိနိုင်းပေါင်းစပ် ဆောင်ရွက်ပေးပြီး အစည်းအဝေးကို ရုပ်သိမ်း ခဲ့သည်။

            ဆက်လက်ပြီး တိုင်းဒေသကြီး ဝန်ကြီးချုပ် ဦးသာအေးနှင့် တာဝန်ရှိသူများ သည် ညပိုင်းတွင် မုံရွာမြို့၊ မြို့တော်ခန်းမ၌ ကျင်းပသော စစ်ကိုင်းတိုင်းဒေသကြီး (၂၂) ကြိမ်မြောက်၊ မြန်မာတိုင်းရင်းသားတို့၏ ရိုးရာယဉ်ကျေးမှု အဆို၊ အက၊ အရေး၊ အတီး ပြိုင်ပွဲ ဆုချီးမြင့်ပွဲ အခမ်းအနားသို့ တက်ရောက်ကြသည်။

            ရှေးဦးစွာ တိုင်းဒေသကြီး ဝန်ကြီးချုပ် ဦးသာအေးက အမှာစကားပြောကြားပြီး တိုင်းဒေသကြီး ဝန်ကြီးချုပ် ဦးသာအေးက မဟာဂီတ (ကျား/မ) အခြေခံပညာ(၅-၁၀) ပြိုင်ပွဲများတွင် ဆုရရှိသူများအား လည်းကောင်း၊ တိုင်းဒေသကြီး လွှတ်တော် ဥက္ကဌ ဦးသင်းလိူင်က ခောတ်ဟောင်းကာလပေါ်၊ အခြေခံပညာ(၁၀-၁၅)ပြိုင်ပွဲများတွင် ဆုရရှိသူ များအား လည်းကောင်း၊ အနောက်မြောက်တိုင်း စစ်ဌာချုပ် တိုင်းမှူး ဗိုလ်မှူးချုပ် သန်းလိူင်က မဟာဂီတ(ကျား/မ) အခြေခံပညာ(၁၅-၂၀)ပြိုင်ပွဲများတွင် ဆုရရှိသူများအား ဆုများအသီးသီး ပေးအပ်ချီးမြင့်ကြသည်။

            ဆက်လက်၍ တိုင်းဒေသကြီး တရားသူကြီးချုပ်၊ လွှတ်တော် ဒုတိယဥက္ကဌနှင့် တိုင်းဒေသကြီး ဥပဒေချုပ်၊ စာရင်းစစ်ချုပ်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ မြို့မိ၊မြို့ဖများက ပြိုင်ပွဲများတွင် ဆုများရရှိ်သော အနုပညာရှင်များအား ဆုများအသီးသီး ပေးအပ်ချီးမြင့်ကြကာ ဆုရအနုပညာရှင်များက အဆို၊အကများဖြင့် ဧည့်ခံဖျော်ဖြေကြ သည်။

            ထို့နောက် တိုင်းဒေသကြီး ဝန်ကြီးချုပ် ဦးသာအေးက ဘာသာရပ်အလိုက် တံခွန်စိုက်ဆု ရရှိသော ခရိုင်များအား ဆုဖလားများနှင့် ငွေသားဆုများ အသီးသီး ပေးအပ်ချီးမြင့်ပြီး အနုပညာရှင်များအား ဂုဏ်ပြုပန်းခြင်းနှင့် ဂုဏ်ပြုဆုငွေများအား ပေးအပ် ချီးမြင့်ကာ အနုပညာရှင်များက "အောင်စေပိုင်စေ" သီချင်း သီဆိုဖျော်ဖြေကာ အခမ်း အနားကို ရုပ်သိမ်းခဲ့ကြသည်။

            ဆက်လက်ပြီး တိုင်းဒေသကြီး ဝန်ကြီးချုပ် ဦးသာအေးနှင့် တာဝန်ရှိသူများ သည် နိုဝင်ဘာလ (၂၀)ရက်၊ ညနေပိုင်းတွင် မုံရွာမြို့၊ မဟာဗောဓိတစ်ထောင် ကမ္ဘာ့ အကြီးဆုံး ထိုင်တော်မူ ဗုဒ္ဓရုပ်ပွားတော်မြတ်ကြီး တည်ထားကိုးကွယ် ဆောက်လုပ်နေမှု အား ကြည့်ရူ့စစ်ဆေးပြီး လိုအပ်သည်များကို တာဝန်ရှိသူများနှင့် ညှိနိုင်းပေါင်းစပ် ဆောင်ရွက်ပေးခဲ့ကြောင်း သတင်းရရှိသည်။

၂၀၁၅ခုနှစ်၊ အမျိုးသား၊ အမျိုးသမီး(အလွတ်တန်း) ပြေးခုန်ပစ်ပြိုင်ပွဲ မြင်းမူမြို့၌ ကျင်းပ

            စစ်ကိုင်းတိုင်းဒေသကြီး၊ မြင်းမူမြို့နယ်အားကစားနှင့် ကာယပညာကော်မတီမှ ကြီးမှူးကျင်းပသော ၂၀၁၅ ခုနှစ် အမျိုးသား၊ အမျိုးသမီး(အလွတ်တန်း) ပြေးခုန်ပစ်ပြိုင်ပွဲကို နိုဝင်ဘာလ(၂၂)ရက်က မြင်းမူမြို့၊ ပြည်သူ့အားကစားကွင်း၌ ကျင်းပပြုလုပ်ခဲ့ကြောင်း သိရသည်။

            အမျိုးသား၊ အမျိုးသမီး(အလွတ်တန်း) မီတာ(၁၀ဝ၊ ၂၀ဝ၊ ၄၀ဝ၊ ၈၀ဝ)အပြေးပြိုင်ပွဲတွင် အမျိုးသား(၆၂)ဦး၊ အမျိုးသမီး(၃၄)ဦး၊ အလျားခုန်ပြိုင်ပွဲတွင် အမျိုးသား(၂၀)ဦး၊ အမျိုးသမီး(၃၅)ဦး၊ သံလုံးပစ်ပြိုင်ပွဲတွင် အမျိုးသား(၁၀)ဦး၊ အမျိုးသမီး(၂၇)ဦးနှင့် သံပြားပစ်ပြိုင်ပွဲတွင် အမျိုးသား(၁၀)ဦး၊ အမျိုးသမီး(၃၁)ဦး ပါဝင်ယှဉ်ပြိုင်ခဲ့ကြသည်။

            ထို့နောက် ဆုချီးမြှင့်ပွဲကိုကျင်းပရာ မြို့နယ်အားကစားနှင့် ကာယပညာကော်မတီဝင် မြို့နယ်ရဲတပ်ဖွဲ့မှူး ရဲမှူးကျော်စိုး၊ မြို့နယ်ပညာရေးမှူး ဒေါ်မြသိန်း၊ မြို့နယ်အားကာဦးစီးမှူး ဦးဝင်းလှိုင်နှင့် မြို့နယ်စည်ပင်သာယာရေးကော်မတီဝင် ဦးဇော်ဝင်းတို့က ပထမ၊ ဒုတိယ၊ တတိယဆု ရရှိကြသော အားကစားသမားများအား ဆုများ ပေးအပ်ချီးမြှင့်ခဲ့ကြကြောင်း သိရသည်။

Subcategories

Online Visitors

Flag Counter

စစ်ကိုင်းတိုင်းဒေသကြီးအစိုးရအဖွဲ့

စိန်ပန်းပြာလမ်းနှင့် ကမ်းနားလမ်းထောင့်၊ အိုးဘိုတောင်ရပ်ကွက်၊ မုံရွာမြို့။
ဖုန်း - ၀၇၁ - ၂၂၅၃၁
ဖက် - ၀၇၁ - ၂၂၅၃၇