ဗန်းမောက်မြို့နယ် ဒေသဆိုင်ရာအချက်အလက်များ

ဒေသသမိုင်းအကျဉ်း

ဗန်းမောက်မြို့နယ်သည် အစဉ်အဆက် အလွန်ရှေးကျသောခေတ်မှစ၍ လူတို့နေထိုင်ရာအရပ် ဖြစ်ခဲ့သည်။ ပုပ္ပါးစောရ ဟန်းမင်း မင်းပြုပြီး သက္ကရာဇ်(၄၉၂)တွင် ရှင်အာစရမထေရ်သည် ဗန်းမောက်မြို့နယ်၊ မံယူးကြီးအရပ်သို့ သာသနာပြုကြွ ရောက်လာပါသည်။ ၎င်းမထေရ်၏ကျင့်ကြံအားထုတ်မှုများကို မံယူးကြီး ကျေးရွာသားများက ကြည်ညိုကြ၍ ကျောင်းဆောက်လုပ် လှူဒါန်းကြကုန်၏ဟူ၍ ဦးဣန္ဒာဝံသ (ရွာသစ်ကုန်းကျောင်း၊ မံစီ) ရေးသားပြုစုသော ရွှေဇေယျာဘုရားသမိုင်းတွင် ဖော်ပြထားပါသည်။ မံယူးကြီးကျေးရွာသည် ဗန်းမောက်မြို့နယ်၏ ရှေးအကျဆုံး ကျေးရွာများတွင် ပါဝင်ပါသည်။ ယင်းခေတ်တွင် ဗန်းမောက်ဟူ၍ အမည်မတွေ့ရပေ၊ မြန်မာဘုရင် မင်းတုန်းမင်းလက်ထက် ဝန်းသိုစော်ဘွားပိုင်သော (၅)ခရိုင် တွင် ဗန်းမောက်ခရိုင်ဟူ၍ တွေ့ရပြီး၊ ရှမ်း အများဆုံးနေထိုင်ရာ ဖြစ်ခဲ့ပါသည်။ မားပုတ်ဟူသော ရှမ်းစကားမှ ဗန်းမောက်ဟူ၍ ဖြစ်ပေါ်ခဲ့ကြောင်း သိရှိရပါသည်။ မားပုတ် ဟူသော ဝေါဟာရမှာ -မား - လာ၍     ပုတ် - လှုပ်နှိုးသည် ဟူ၍ဖြစ်ပြီး အိပ်သောသူအား လှုပ်နှိုးသည်ဟု အဓိပ္ပာယ်ရပါသည်။

ပထဝီဝင် အနေအထား

တည်နေရာ၊ အကျယ်အဝန်း

        ဗန်းမောက်နယ်သည် ‌မြောက်လတ္တီတွဒ်၂၄ဒီဂရီ ၁၀ မိနစ် ၂၄ ဒီဂ ရီ ၅၉ မိနစ်အကြား အရှေ့လောင်ဂျီတွဒ် ၉၅ ဒီဂရီ ၁၇ မိနစ်၊ ၉၆ ဒီဂရီ ၁၂ မိနစ်အကြားတွင် တည်ရှိပါသည်။ အရှေ့မှအနောက်သို့ (၄၈)မိုင်နှင့် တောင်မှမြောက်သို့ (၆၀)မိုင် ရှည်လျားပါသည်။ ဗန်းမောက်မြို့နယ်နှင့် မြို့တို့၏ ဧရိယာစတုရန်းမိုင်မှာ အောက်ပါအတိုင်း ဖြစ်ပါသည်-

နယ်နိမိတ်

ဗန်းမောက်မြို့နယ်၏ အရှေ့ဘက်တွင် အင်းတော်မြို့နယ်၊ တောင်ဘက်တွင် ၀န်းသိုမြို့နယ်နှင့် ပင်လည်ဘူးမြို့နယ်၊ အနောက်ဘက်တွင် ဖောင်းပြင်မြို့နယ်နှင့် ဟုမ္မလင်းမြို့နယ်၊ မြောက်ဘက်တွင် ကချင်ပြည်နယ်၊ မိုးညှင်းမြို့နယ်တို့နှင့် နယ်နိမိတ် ထိစပ်လျက် ရှိပါသည်။

မြေမျက်နှာသွင်ပြင်

ဗန်းမောက်မြို့နယ်သည် တောင်ကုန်းတောင်တန်းများပေါများပြီး မြေပြန့်လွင်ပြင်နည်းပါး၍ ချောင်းများရှိပါသည်။

ရေဆင်း

ဗန်းမောက်မြို့နယ်သည် မြစ်ချောင်းများ ပေါများသည့် ဒေသဖြစ်ပြီး ထင်ရှားသည့် မြစ်ချောင်းများမှာ ဗန်းမောက်ချောင်း၊ ခေါပုတ်ချောင်း၊ ချောင်းကြီးချောင်း၊ ကတောင်ချောင်း၊ ဆင်သေချောင်း၊ မံယူးကြီးချောင်း၊ မဲဇာချောင်း၊ မူးမြစ်ဖျား၊ နန့်ကျင်ချောင်း၊ နန့်မားချောင်း၊ နန့်ခမ်းချောင်း၊ မံကပ်ချောင်း၊ တောင်ချောင်း၊ ပင့်စင်တဲချောင်းတို့ ဖြစ်ပါသည်။ မြစ်ချောင်းအများစုမှာ ရေချိုများဖြစ်၍ စိုက်ပျိုးရေ၊ သောက်သုံးရေ စသည်ဖြင့် အသုံးပြုနိုင်သည်။ ချောင်းကြီးချောင်းနှင့် မူးမြစ်သည် မိုးတွင်းကာလများတွင် စက်လှေများ သွားလာနိုင်သော မြစ်များဖြစ်ပါသည်။

ပင်လယ်ရေမျက်နှာပြင်ထက် အမြင့်

ဗန်းမောက်မြို့နယ်သည် ပင်လယ်ရေမျက်နှာပြင် အထက်အမြင့် (၅၀၀)ပေမှ (၇၀၀)ပေအတွင်းတွင် တည်ရှိပါသည်။

ဆက်လက်ဖတ်ရှု့ရန်ဤနေရာကိုနှိပ်ပါ>>>Click Here