ခန္တီးမြို့နယ်

ခန္တီးမြို့နယ် ဒေသဆိုင်ရာအချက်အလက်များ

ဒေသသမိုင်းအကျဉ်း

ခန္တီးမြို့နယ်သည် ခန္တီးခရိုင်အတွင်း ပါ၀င်သည်။ နယ်မြေအားလုံးသည် (၁-၁-၁၉၄၀)​နေ့မတိုင်မီက အထက်ချင်းတွင်း ခရိုင်၌ပါ၀င်ခဲ့သည်။ (၂၁-၁၂-၃၉)ရက်စွဲပါ အမိန့်ပြန်တမ်းအမှတ် (၆၂၉)ဖြင့် (၁-၁-၄၈)ရက်နေ့မှစ၍ နာဂတောင်တန်းခရိုင်ဟု သတ်မှတ်ခဲ့ပြီး ခန္တီးမြို့နယ် တစ်စိတ်တစ်ဒေသသည် ခန္တီးစော်ဘွားနယ်တွင် ပါ၀င်ခဲ့ပါသည်။ ယခင်ခရိုင်၀န်သည် ဟုမ္မလင်းတွင် ရုံးစိုက်ပါသည်။ (၂-၆-၁၉၄၇)ရက်စွဲပါ နယ်ခြားအုပ်ချုပ်ရေး ပြန်တမ်းအမှတ် (၂၀၅)အရ နာဂတောင်တန်းခရိုင်တွင် (က)နာဂတောင်တန်းဒေသ၊ (ခ)ဇင်္ဂလိန်းခန္တီးနယ်မြေ၊ (ဂ)သောင်သွပ်ရှမ်း စော်ဘွားနယ်မြေဟု သတ်မှတ်ပါ၀င်ပါသည်။ ယင်းအမိန့်အရ ခရိုင်ရုံးကို ဟုမ္မလင်းမြို့မှ ခန္တီးမြို့သို့ ပြောင်းလဲ ရုံးစိုက်ခဲ့ပါသည်။ ၁၉၂၆ခုနှစ် သောင်သွပ်နှင့် ဇင်္ဂလိန်း ခန္တီးဥပဒေနှင့် ရာဇဝတ်တရားစီရင်ရေး အမိန့်အရ ကျန်ဒေသများကို ချင်းတောင်တန်း စည်းမျဉ်းဥပဒေအရ ကျင့်သုံး အုပ်ချုပ်ခဲ့ပါသည်။

လွတ်လပ်ရေးရပြီးနောက် (၃၀.၁၁.၅၂)နေ့ သောင်သွပ်စော်ဘွားနှင့် ခန္တီးစော်ဘွားတို့ အာဏာစွန့်ပြီးနောက် ခန္တီးစော်ဘွားနယ်မြေအတွက် မြို့မဝန်ထောက်ကလည်းကောင်း အုပ်ချုပ်ရေးမှူး တာ၀န်ယူ အုပ်ချုပ်ခဲ့ပါသည်။ (၂.၃.၁၉၆၅)နေ့စွဲပါ ကြော်ငြာစာအရ နာဂတောင်တန်းခရိုင်ကို ခန္တီးခရိုင်ဟု ပြောင်းလဲသတ်မှတ်ခဲ့ပြီး ခန္တီးမြို့တွင် မြို့နယ်တိုက်နယ်ခွဲအဖြစ် ဆင်သေနှင့် ကောင်းဟိန်တို့ကို သတ်မှတ် ဖွဲ့စည်းခဲ့ပါသည်။

စော်ဘွားများ၏ နောက်ဆုံးစော်ဘွားမှာ သီရိပျံချီစဝ်မြစိန်ဖြစ်ပြီး ၁၉၅၂ခုနှစ်တွင် အာဏာစွန့်ခဲ့ပြီးနောက် ပြည်ထဲရေးနှင့် သာသနာရေးဝန်ကြီးဌာန၏ (၂၂.၇.၇၂)နေ့တွင် အမိန့်ကြော်ငြာစာဖြင့် ခန္တီးမြို့အား ရပ်ကွက် (၇)ခုဖြင့် လည်းကောင်း၊ (၂၅.၁၁.၁၉၇၂)ရက်နေ့ အမိန့်ကြော်ငြာစာအရ ယခင်အမိန့်ကိုပြင်ဆင်၍ ရပ်ကွက်(၃)ခုဖြင့်လည်းကောင်း မြို့ဟုသတ်မှတ်ခဲ့ကြောင်း လေ့လာသိရှိရပါသည်။

နှစ်ကာလ ကြာမြင့်လာသော အခါတွင် ခန္တီးမြို့နယ်ရှိ မြေပြင်ရပ်ကွက်/ ကျေးရွာများသည် ပြည်ထဲရေးဝန်ကြီးဌာနမှ အတည်ပြုထားသည့် စာရင်းနှင့်ကွဲလွဲလာပြီး၊ အကြောင်းအမျိုးမျိုးကြောင့် ကျေးရွာများလျော့သွားခြင်း၊ တိုးလာခြင်းတို့ ဖြစ်ပေါ်လာခဲ့သဖြင့် ခန္တီးမြို့နယ် အထွေထွေအုပ်ချုပ်ရေးဦးစီးဌာနမှ အမှုတွဲများဖွင့်လှစ်၍ အဆင့်ဆင့်တင်ပြခဲ့ရာ ခန္တီးမြို့နယ်အတွင်းရှိ ကျေးရွာအုပ်စုအသီးသီးမှ ကျေးရွာ(၂၀)တိုးချဲ့ဖွဲ့စည်းခြင်း၊ ကျေးရွာ(၂၆)ရွာ အမည်စာရင်းမှ ပယ်ဖျက်ခြင်းနှင့် ကျေးရွာ(၄)ရွာ အမည်ပြောင်းလဲ ပြင်ဆင်ခြင်းတို့ကို ပြည်ထဲရေးဝန်ကြီးဌာန၏ ၂၀၁၁ခုနှစ် ဖေဖော်ဝါရီလ (၂၄)ရက်နေ့ အမိန့်ကြော်ငြာစာဖြင့် လည်းကောင်း၊ ရွှေမြင့်မိုရ်ကျေးရွာအား နန်ဖါကျေးရွာအုပ်စုအတွင်း ကျေးရွာတိုးချဲ့ဖွဲ့စည်း ခွင့်ပြုမိန့်ကို ပြည်ထဲရေးဝန်ကြီးဌာန၏(၂၅-၃-၂၀၁၆)ရက်စွဲပါ အမိန့်ကြော်ငြာစာအမှတ် (၁၀၀၇/၂၀၁၆)ဖြင့် လည်းကောင်း၊ ရွှေပြည်သာကျေးရွာအုပ်စုအား (ရွှေပြည်သာ၊ ချောင်းသာ၊ လသာ၊ မြကျွန်းသာ) ရွာများပါ၀င်လျက် ကျေးရွာအုပ်စုအသစ် တိုးချဲ့ဖွဲ့စည်းခြင်းအား ပြည်ထဲရေးဝန်ကြီးဌာန၏(၃-၁-၂၀၁၇)ရက်စွဲပါ အမိန့်ကြော်ငြာစာအမှတ် (၁၁/၂၀၁၇)ဖြင့်လည်းကောင်း၊ ပင်လုံ(ဟတ္ထိ)ကျေးရွာအုပ်စု (သက္ကယ်တောင်ကျေးရွာ)၊ အရှေ့ကောက်တောင်းကျေးရွာအုပ်စု (ချောင်း၀ကျေးရွာ)နှင့် လင်းဖါးကျေးရွာအုပ်စု (ကျကိုက်ကျေးရွာ)များအား ပြည်ထဲရေးဝန်ကြီးဌာန၏ (၁၂-၁-၂၀၁၇) ရက်စွဲပါ အမိန့်ကြော်ငြာ စာအမှတ် (၅၈/၂၀၁၇)ဖြင့် လည်းကောင်း ကျေးရွာတိုးချဲ့ ဖွဲ့စည်းခွင့်ပြုမိန့် အတည်ပြုပေးခဲ့ပြီး ဖြစ်ပါသည်။

 

ပထဝီဝင် အနေအထား

 

တည်နေရာအကျယ်အဝန်း

မြောက်လတ္တီတွဒ် ၂၅ဒီဂရီ ၂၁မိနစ်မှ ၂၆ဒီဂရီ  ၃၅မိနစ်အထိ၊ အရှေ့လောင်ဂျီတွဒ် ၉၅ဒီဂရီ ၀၂မိနစ်မှ ၉၆ဒီဂရီ ၁၂မိနစ်အထိ ဖြစ်ပါသည်။ အရှေ့နှင့်အနောက် (၇၂)မိုင် (၄)ဖါလုံ ရှည်လျားပြီး တောင်နှင့်မြောက် (၈၃)မိုင် (၆)ဖါလုံ ရှည်လျားပါသည်။

 

စဉ်

မြို့နယ်

မြို့နယ်ဧရိယာ

စတုရန်းမိုင်

ကျေးရွာအုပ်စု

ဧရိယာစတုရန်းမိုင်

မြို့ဧရိယာ

စတုရန်းမိုင်

ခန္တီး

၃၁၆၅.၄၅

၃၁၅၉.၉၇

၅.၄၈

 

မြို့နယ်ချုပ်

၃၁၆၅.၄၅

၃၁၅၉.၉၇

၅.၄၈

 

နယ်နိမိတ်

မြို့နယ်၏ မြောက်ဘက်တွင် နန်းယွန်းမြို့နယ်၊ အရှေ့ဘက်တွင် တနိုင်းမြို့နယ်နှင့် ဖားကန့်မြို့နယ်၊ တောင်ဘက်တွင် လေရှီးမြို့နယ်နှင့် ဟုမ္မလင်းမြို့နယ်၊ အနောက်ဘက်တွင် လဟယ်မြို့နယ်တို့နှင့် နယ်နိမိတ်ချင်း ထိစပ်လျက်ရှိပါသည်။

 

မြေမျက်နှာသွင်ပြင်

မြန်မာနိုင်ငံမြောက်ပိုင်း၊ အနောက်မြောက်ဘက် တောင်ကုန်းဒေသတွင် ပါ၀င်ပြီး ခါကာဘိုရာဇီနှင့် ပတ်ကွိုင်တောင်တန်းကြီးများမှ သွယ်တန်းလာသော နာဂတောင်တန်းတောင်စွယ်၊ ချိုင့်ဝှမ်း၊ လျှိုမြောင်ကမ်းပါးများ ဖြစ်ပါသည်။ တောင်တန်းများသည် အနောက်ဘက်နှင့် မြောက်ဘက်တွင် မြင့်မားပြီး တောင်ဘက်တွင် နိမ့်ဆင်းသွားပါသည်။ မြေပြန့်လွင်ပြင် အလွန်နည်းပါးပြီး မြို့နယ်၏အလယ်တွင် ချင်းတွင်းမြစ် ဖြတ်သန်းစီးဆင်းလျက် ရေစီးသန်သည့် ချောင်းငယ်များ ပေါများသည့်အပြင် မတ်စောက်သော ကမ်းပါးများ ရှိခြင်းကြောင့် သွားလာမှုခက်ခဲပါသည်။ ချင်းတွင်းမြစ်ဝှမ်းအတွင်း ဝဲ/ယာ စီးဆင်းကြသည့် နန်ဖုတ်ချောင်း၊ နမ့်မော်ချောင်း၊ နန်တုန်ထွန်းချောင်း၊ နန့်ကတောချောင်း၊ နန်စီပွန်ချောင်း၊ နန့်စဝါးချောင်း၊ နန့်စလူး ချောင်း၊ နန်ပမင်ချောင်း၊ နန်ဖီလင်းချောင်း၊ နန်တ၀က်ချောင်း၊ နန်အီမဲချောင်းတို့စီး၀င်လျက် ချောင်းအနီးတဝိုက် ကမ်းဘေးဝဲ/ယာတွင် မြေပြန့်အနည်းငယ် ရှိပါသည်။ တောင်တန်းများအနေဖြင့် မြို့နယ်၏ မြောက်ပိုင်းတွင် စွမ်ပရာဘွမ်၊ ဗလောင် ရကာဘွန်၊ ကရာဘွန်၊ငလန်ဘွမ်၊ မလ်ဘွမ်/ အင်ကမ်ဘွမ်တို့ ရှိပြီး ချင်းတွင်းမြစ် အနောက်ဘက်ပိုင်းတွင် စာရာမေရိတောင်မှ ဆင်းသက်လာသည့် မူရာကျိမ်ညူတောင်၊ ဗပါချောင်၊ လွမ်ပေါဆိပ်မောင်အီ ကိုတောင်၊ ဆိုင်ကာဘွမ် စသည့်တောင်တန်း များရှိပါသည်။

 

ရေဆင်း

ခန္တီးမြို့နယ်သည် မြစ်ချောင်းများ ပေါများသည့် ဒေသတစ်ခုဖြစ်ပြီး မြစ်/ချောင်းများအားလုံးသည် မြောက်မှတောင်သို့ စီးဆင်းလျက်ရှိပါသည်။ ထင်ရှားသောမြစ်မှာ ချင်းတွင်းမြစ်ဖြစ်ပြီး မြို့၏အလယ်မှဖြတ်၍ မြောက်မှတောင်သို့ စီးဆင်းပြီး ဧရာဝတီမြစ်ထဲသို့ စီးဝင်ပါသည်။ ဒေသအတွင်းရှိ ရေအရင်းမြစ်အားလုံးသည် ရေချိုများဖြစ်၍ စိုက်ပျိုးရေအတွက် လည်းကောင်း၊ သောက်သုံးရေအတွက် လည်းကောင်း အသုံးပြုနိုင်ပါသည်။ ချင်းတွင်းမြစ်မှာ နွေရာသီတွင် ရေအနက် (၂)ပေခန့်သာ ရှိ၍ သင်္ဘော/ စက်​လှေများ သွားလာမှုခက်ခဲသော ဒေသတစ်ခုဖြစ်ပါသည်။

 

ပင်လယ်ရေမျက်နှာပြင် အထက်အမြင့်

ခန္တီးမြို့နယ်သည် ပင်လယ်ရေမျက်နှာပြင်အထက် အမြင့်ပေ (၄၁၀)အထက် တည်ရှိပါသည်။ မြို့နယ်အတွင်း အမြင့်ဆုံးတောင်မှာ စာရာမေတိတောင်ဖြစ်ပြီး အမြင့်ပေ (၁၂၅၅၃)ရှိပါသည်။ မြို့နယ်အတွင်း အနိမ့်ဆုံးဒေသမှာ ဆင်သေကျေးရွာအုပ်စု နန်မုံကျေးရွာဖြစ်ပြီး အမြင့်ဆုံးဒေသမှာ ခမောင်းကျေးရွာအုပ်စု၊ ခမောင်းရွာ ဖြစ်ပါသည်။


ဆက်လက်ဖတ်ရှု့ရန်ဤနေရာကိုနှိပ်ပါ>>>Click Here

သတင်း အချက်အလက်

ဒေသန္တရ အချက်အလက်များ

ခရိုင်နှင့် မြို့နယ်အလိုက် ဒေသန္တရအချက်အလက်များ

ပညာရေးကဏ္ဍ

ကျန်းမာရေးကဏ္ဍ

ဘာသာရေးကဏ္ဍ

ကျေးလက်ဖွံ့ဖြိုးရေးနှင့် ဆင်းရဲမှုလျှော့ချရေးကဏ္ဍ

ရွေးကောက်ပွဲ ကော်မရှင်ကဏ္ဍ

တိုင်းရင်းသား လူမျိုးများ

ပွဲတော်များ

Online Visitors

Flag Counter

စစ်ကိုင်းတိုင်းဒေသကြီးအစိုးရအဖွဲ့

စိန်ပန်းပြာလမ်းနှင့် ကမ်းနားလမ်းထောင့်၊ အိုးဘိုတောင်ရပ်ကွက်၊ မုံရွာမြို့။
ဖုန်း - ၀၇၁ - ၂၂၅၃၁
ဖက် - ၀၇၁ - ၂၂၅၃၇
facebook-icon