မုံရွာ၊ မတ် ၅
မြန်မာနိုင်ငံအမျိုးသမီးရေးရာအဖွဲ့ချုပ်၏ ၂၀၂၄ခုနှစ်အတွက် (၂၁)ကြိမ်မြောက်နှစ်ပတ်လည်အစည်းအဝေး ထပ်ဆင့်ရှင်းလင်းပွဲ အခမ်းအနား ကို ယနေ့ နံနက် (၉)နာရီက စစ်ကိုင်းတိုင်းဒေသကြီးအစိုးရအဖွဲ့ရုံး၊ ချင်းတွင်းခန်းမ၌ ကျင်းပပြုလုပ်ရာ အခမ်းအနားသို့ စစ်ကိုင်းတိုင်းဒေသကြီး အမျိုး သမီးရေးရာအဖွဲ့၊ နာယက ဒေါ်မြင့်မြင့်အောင်၊ စစ်ကိုင်းတိုင်းဒေသကြီးအမျိုးသမီးရေးရာအဖွဲ့၊ ဥက္ကဋ္ဌ နှင့်အတွင်းရေးမှူး၊ တိုင်း/ခရိုင်/မြိုနယ် အမျိုးသမီးရေးရာအဖွဲ့ ဥက္ကဌများနှင့်အဖွဲ့ဝင်များ တက်ရောက်ကြသည်။
ဦးစွာ အခမ်းအနားတွင် စစ်ကိုင်းတိုင်းဒေသကြီးအမျိုးသမီးရေးရာအဖွဲ့၊ နာယက က တိုင်းဒေသကြီး အတွင်း အမျိုးသမီးရေးရာအဖွဲ့ လုပ်ငန်းများ (၁)နှစ်တာလုပ်ငန်းဆောင်ရွက်ချက်များနဲ့ အားသာချက် ၊ အားနည်းချက်များကို သုံးသပ်ပြီး အောင်မြင်အောင် ကြိုးစားဆောင်ရွက်သွားကြရန် နှင့် “အမျိုး သမီးများဘဝဖွံ့ဖြိုးဖို့ ဝိုင်းဝန်းကြိုးပမ်းဆောင်ရွက်ကြပါစို့”ဆိုတဲ့ ဆောင်ပုဒ်အတိုင်း အမျိုးသမီးများရဲ့ဘဝဖွံ့ဖြိုးတိုးတက်ရေး လုပ်ငန်းများကို ကျရာကဏ္ဍအသီးသီးမှဆက်လက်ပူးပေါင်း ဆောင်ရွက်သွားကြဖို့ တိုက်တွန်းပြောကြားခဲ့သည်။
ဆက်လက်ပြီး စစ်ကိုင်းတိုင်းဒေသကြီးအမျိုးသမီးရေးရာအဖွဲ့ ဥက္ကဋ္ဌ က မြန်မာနိုင်ငံအမျိုးသမီးရေးရာအဖွဲ့ချုပ်၏ (၂၁)ကြိမ်မြောက် နှစ်ပတ်လည် အစည်းအဝေးအတွေ့အကြုံနှင့် တိုင်း/ခရိုင်/မြိုနယ် အမျိုးသမီးရေးရာအဖွဲ့များ၏ ၂ဝ၂၄ ခုနှစ်အတွင်း လုပ်ငန်းဆောင်ရွက်ချက်များကိုလည်းကောင်း၊ စစ်ကိုင်းတိုင်းဒေသကြီးအမျိုးသမီးရေးရာအဖွဲ့၊ အတွင်းရေးမှူးက၂၀၂၅ ခုနှစ်အတွက် ဆောင်ရွက်ရမည့် ရှေ့လုပ်ငန်းစဉ် (၉)ရပ်အားလည်းကောင်း အသီးသီး ဖတ်ကြား ရှင်းလင်းခဲ့သည်။
ထို့နောက် စစ်ကိုင်းတိုင်းဒေသကြီးအမျိုးသမီးရေးရာအဖွဲ့ နာယက ဒေါ်မြင့်မြင့်အောင်နှင့် အဖွဲ့က တိုင်းဒေသကြီး အတွင်းရှိ ခရိုင်အလိုက် အမျိုးသမီးရေးရာအဖွဲ့များ၏ လုပ်ငန်းများလှုပ်ရှားဆောင်ရွက် ခဲ့မှုတို့နှင့်ပတ်သက်၍ ပညာရေးလုပ်ငန်းဆောင်ရွက်မှု ၊ ကျန်းမာရေးလုပ်ငန်းဆောင်ရွက်မှု ၊ ဥပဒေရေးရာလုပ်ငန်းဆောင်ရွက်မှု၊ ဝင်ငွေတိုးသင်တန်းဖွင့်လှစ်မှု စသည့် ဂုဏ်ပြုဆုများကို အသီးသီးပေးအပ်ချီးမြှင့်ခဲ့ကြပြီးနောက် အမှတ်တရစုပေါင်းမှတ်တမ်းတင်ဓာတ်ပုံရိုက်ကူးကာ အခမ်းအနားကို ရုပ်သိမ်းလိုက်ကြောင်းသိရသည်။
အဆိုပါ အခမ်းအနားအပြီးတွင် တိုင်းဒေသကြီး အတွင်း ခရိုင်အလိုက် အမျိုးသမီးရေးရာအဖွဲ့များ၏ ပြည်သူ့အကျိုးပြု ဆောင်ရွက်ခဲ့မှု မှတ်တမ်းဓါတ်ပုံပြဘုတ်များ နှင့် တိုင်းဒေသကြီးပြည်သူ့ကျန်းမာရေးဦးစီးဌာနက ကိုဗစ်-၁၉ ရောဂါကာကွယ်ဆေး ထပ်ဆောင်းထိုးနှံပေးနေ မှု တို့အား တက်ရောက်လာကြသူများက ကြည့်ရှုအားပေးခဲ့ကြောင်း သိရသည်။
