ဒီဇင်ဘာ ၂၂
စစ်ကိုင်းတိုင်းဒေသကြီးအစိုးရအဖွဲ့နှင့် မုံရွာစက်မှုဇုန် လုပ်ငန်းကော်မတီများနှင့် တွေ့ဆုံဆွေးနွေးပွဲ အခမ်းအနားကို ဒီဇင်ဘာလ(၂၁)ရက်၊ မွန်းလွဲ(၁)နာရီအချိန်တွင် တိုင်းဒေသကြီး အစိုးရအဖွဲ့ရုံးဝန်းအတွင်းရှိ ချင်းတွင်ခန်းမတွင် ကျင်းပရာ တွေ့ဆုံပွဲ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီးအဆင့် ဌာနဆိုင်ရာအကြီးအကဲများ၊ မုံရွာစက်မှုဇုန် ဥက္ကဌနှင့် အဖွဲ့ဝင်များ၊ လုပ်ငန်းရှင်များ ဖိတ်ကြားထားသူများ တက်ရောက်ကြသည်။
ရှေးဦးစွာ စစ်ကိုင်းတိုင်းဒေသကြီး တိုင်းဒေသကြီးဝန်ကြီးချုပ် ဦးမြတ်ကျော်က အဖွင့်အမှာစကား ပြောကြားရာတွင် “ စစ်ကိုင်းတိုင်းဒေသကြီးအနေဖြင့် မုံရွာစက်မှုဇုန်၊ မုံရွာစက်မှုဇုန်ခွဲ(ရွှေဘို)၊ မုံရွာစက်မှုဇုန်ခွဲ(စစ်ကိုင်း)၊ ကလေးစက်မှုဇုန်ဆိုပြီး စက်မှုဇုန်(၄)ခု တည်ထောင်ဖွင့်လှစ်ပြီး စပ်ရုံအလုပ်ရုံ စုစုပေါင်း(၈၂၁)ရုံဖြင့် လည်ပတ်လုပ်ကိုင်လျက်ရှိပါကြောင်း၊ စစ်ကိုင်းတိုင်း ဒေသကြီးမှာရှိတဲ့ မှတ်ပုံတင်ပုဂ္ဂလိက စက်မှုလုပ်ငန်းများဟာ များသောအားဖြင့် အသေးစား၊ အငယ်စား၊ အလတ်စား (MSME)လုပ်ငန်းများဖြစ်တာကြောင့် ၎င်း(MSME)များ ဖွံ့ဖြိုးတိုးတက်ရေးအတွက် အလုပ်အကိုင်အခွင့်အလမ်းများ ရရှိရေး၊ နည်းပညာများရရှိရေး၊ ရင်းနှီးမြုပ်နှံမှုများရရှိရေးနှင့် ချေးငွေဆိုင်ရာမူဝါဒများ ပြောင်းလဲသတ်မှတ်ရေးများကို အစိုးရအဆက်ဆက် ဆောင်ရွက်ခဲ့သလို မိမိတို့နိုင်ငံတော်စီမံအုပ်ချုပ်ရေးကောင်စီ တာဝန်ယူစဉ်ကာလမှာလည်း လိုအပ်သည်များပံ့ပိုး ဆောင်ရွက်ပေးသွားမှာဖြစ်ပါကြောင်း၊ တိုင်းဒေသကြီးအတွင်းရှိ စက်မှုလုပ်ငန်းရှင်များ၊ MSME လုပ်ငန်းရှင်များအား ကိုဗစ်-၁၉ ချေးငွေရရှိနိုင်ရေးအတွက် စစ်ကိုင်းတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်းရုံးမှ တာဝန်ရှိသူများ၊ ရင်းနှီးမြုပ်နှံမှုနှင့်ကုမ္ပဏီများညွှန်ကြားမှုဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာနမှ ဝန်ထမ်းများ ပူးပေါင်း ဝန်ဆောင်မှုများပေးခဲ့ရာ လုပ်ငန်းစုစုပေါင်း (၆၉၄)ခုမှ ကိုဗစ်-၁၉ ချေးငွေထုတ်ယူခွင့် (၁၂၅၈၀.၅)ကျပ်သန်း ရရှိခဲ့ပါကြောင်း၊ မိမိတို့ တိုင်းဒေသကြီးအစိုးရအဖွဲ့အနေဖြင့် တက်နိုင်စွမ်းသမျှ ကြိုးပမ်းဆောင်ရွက်ပေးသွာမှာ ဖြစ်ပါကြောင်း ” ပြောကြားခဲ့သည်။
ယင်းနောက် မုံရွာစက်မှုဇုန် ဥက္ကဌနှင့် စက်မှုဇုန်လုပ်ငန်းစု ကော်မတီများမှ တာဝန်ရှိသူများက မိမိတို့စက်မှုလုပ်ငန်းများ ဆောင်ရွက်နေမှု အခြေအနေများနှင့် အခက်အခဲများ အားအသီးသီး ရှင်းလင်းတင်ပြကြသည်။
ဆက်လက်၍ တိုင်းဒေသကြီးအဆင့်ဌာနဆိုင်ရာများမှ စက်မှုလုပ်ငန်းများတွင် မိမိတို့ဌာနလုပ်ငန်းများနှင့် ပတ်သက်၍ လိုအပ်သည်များရှိပါက ပူးပေါင်းဆောင်ရွက်ပေး သွားမည်ဖြစ်ပါကြောင်း အသီးသီး ပြောကြားကြပြီး တိုင်းဒေသကြီး စီးပွားရေးရာဝန်ကြီး ဒေါ်ရီရီသန်းနှင့် တိုင်းဒေသကြီး ဥပဒေချုပ် ဒေါ်လှလှဝင်းတို့က စက်မှုလုပ်ငန်းများနှင့် ပတ်သက်၍ လိုအပ်သည်များ အကြံပြုဆွေးနွေး တင်ပြကြသည်။
ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်က စက်မှုလုပ်ငန်းများနှင့် ပတ်သက်၍ အသီးသီး ဆွေးနွေး တင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ပြီး တွေ့ဆုံဆွေးနွေးပွဲသို့ တက်ရောက်လာကြသော စက်မှုဇုန်ဥက္ကဌနှင့် ကော်မတီဝင်များအား စားသောက်ဖွယ်ရာများဖြင့် တည်ခင်းဧည့်ခံခဲ့ကြောင်း သတင်းရရှိသည်။
