မုံရွာ ဧပြီ ၆
စစ်ကိုင်းတိုင်းဒေသကြီး၊ ခန္တီးခရိုင်၊ ခန္တီးမြို့၊ ရေပေးဝေရေးလုပ်ငန်းသစ် ဖွင့်ပွဲအခမ်းအနားကို ဧပြီလ(၅)ရက်နေ့ နံနက်ပိုင်းတွင် အဆိုပါရေပေးဝေရေး ရေစုကန်တွင် ကျင်းပရာ အခမ်းအနားသို့ တိုင်းဒေသကြီးအစိုးရအဖွဲ့ ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီးချုပ် ဦးဇော်ထူး၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ မြို့မိမြို့ဖများ၊ ဒေသခံတိုင်းရင်းသားများနှင့် တာဝန်ရှိသူများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က စစ်ကိုင်းတိုင်းဒေသကြီးအစိုးရအဖွဲ့အနေဖြင့် တိုင်းဒေသကြီးတစ်ခုလုံး ဖွံ့ဖြိုးတိုးတက်ရေးအတွက် မူဝါဒများချမှတ်၍ လမ်း၊ တံတား၊ ရေပေးဝေရေးစသည့် ဒေသဖွံ့ဖြိုးရေးလုပ်ငန်းများကို အကောင်အထည်ဖော် ဆောင်ရွက်လျက်ရှိပါကြောင်း၊ ယနေ့ဖွင့်လှစ်တဲ့ ခန္တီးမြို့ ရေပေးဝေရေးလုပ်ငန်းဟာလည်း ခန္တီးမြိုက နေလူထု သောက်သုံးရေဖူလုံစွာ ပေးဝေနိုင်မည့်ဒေသဖွံ့ဖြိုးရေး လုပ်ငန်းတစ်ခုဖြစ်ပါကြောင်း၊ ယခုလို ရေပေးဝေရေးလုပ်ငန်းအား အောင်မြင်စွာ ဆောင်ရွက်ပေးနိုင်ခဲ့အတွက် ခန္တီးမြို့ပေါ် အဓိကရပ်ကွက် (၂)ခုကို ရေလုံလောက်စွာ ဖြန်ဝေပေးနိုင်တော့မှာဖြစ်ပြီး ခန္တီးမြို့ လူထုတစ်ရပ်လုံး အကျိုးများစွာရှိသည့်အပြင် ဒေသတွင်းကျန်းမာရေး၊ ပညာရေး၊ စီးပွားရေး၊ လူမူရေး၊ ကိစ္စရပ်တွေမှာလည်း ဟန်ချက်ညီညီ ဖွံ့ဖြိုးတိုးတက်လာမှာ ဖြစ်ကြောင်းနှင့် မြို့ရေပေးဝေ ရေးလုပ်ငန်းအားလည်း ရေရှည်တည်တံ့ ကောင်းမွန်အောင် ဝိုင်းဝန်းဆောင်ရွက်ပေးကြရန် လိုအပ်ပါကြောင်း ပြောကြားခဲ့သည်။ ဆက်လက်၍ တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးသစ်ထူးမြင့်က ခန္တီးမြို့၊ ရေပေးဝေရေးလုပ်ငန်းသစ် ဆောင်ရွက်ခဲ့သည့် လုပ်ငန်းများနှင် ပတ်သက်၍ ရှင်းလင်းတင်ပြပြီး  ခန္တီးမြို့၊ ဒေသခံတိုင်းရင်းသားများကိုယ်စား မြို့မိမြို့ဖတစ်ဦးက ကျေးဇူးတင်စကား ပြန်လည်ပြောကြားသည်။

ယင်းနာက် တိုင်းဒေသကြီးဝန်ကြီးချုပ် ဦးမြတ်ကျော်၊ တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးသစ်ထူးမြင့်၊ ခန္တီးခရိုင် စီမံအုပ်ချုပ်ရေးအဖွဲ့ ဥက္ကဌ ဦးအောင်စိုးမိုး တို့ကခန္တီးမြို့ ရေပေးဝေရေးလုပ်ငန်းသစ်အား ဖဲကြိုဖြတ်ဖွင့်လှစ်ပေးကြပြီး တာဝန်ရှိသူများအတူ စုပေါင်း မှတ်တမ်းတင် ဓာတ်ပုံရိုက်ကူးကာ တိုင်းရင်းသားရိုးရာ အကအဖွဲ့များအား ဂုဏ်ပြုဆုငွေများ ပေးအပ်ချီးမြင့်ကြသည်။

ဆက်လက်ပြီး တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ဂါလံ(၁၅၀၀၀၀)ဆံ့ ရေလှောင်ကန်၊ 390 Watt Solar 420 Nos Array နှင့် Electrical Pump House ၊ ဂါလံ(၅၀၀၀၀)ဆံ့ ရေစုကန်တို့အား လိုက်လံကြည့်ရှုစစ်ဆေးပြီး လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့သည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများက ခန္တီးမြို့ပေါ် သို့ ရပ်ကွက်များရှိအိမ်များတွင်  ၆ လက်မအချင်း ရေပိုက်လိုင်းများဖြင့် သောက်သုံးရေရောက်ရှိမှုတို့အား လိုက်လံကြည့်ရှု စစ်ဆေးခဲ့ကြောင်း သိရသည်။

ယနေ့ဖွင့်လှစ်သည့် ခန္တီးမြို့ ရေပေးဝေရေးလုပ်ငန်းကို ၂၀၂၁-၂၀၂၂ (၆)လ ဘဏ္ဍာ ရေးနှစ်တွင် တိုင်းဒေသကြီးစည်ပင်သာယာရေးအဖွဲ့ ရန်ပုံငွေကျပ် (၁၈၈.၄)သန်းဖြင့် ဂါလံ (၅၀၀၀၀)ဆံ့ ကျောက်စီရေတားတမံ တည်ဆောက်ကာ ဂါလံ(၁.၅)သိန်းဆံ့ရေကန်မှ မြို့ဝင် ဆိုင်းဘုတ်အထိ ၆ လက်မအချင်း ပိုက်လိုင်းသွယ်တန်းပြီး ဆိုလာစနစ်ဖြင့် ဆောင်ရွက်ပြီး လုပ်ငန်း(၁၁)ခုဖြင့် အကောင်အထည်ဖော် ဆောင်ရွက်ခဲ့ကြောင်း သိရသည်။

ဆက်လက်ပြီး တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများသည် ခန္တီးမြို့၊ ခရိုင်/မြို့နယ် ဥပဒေရုံးအဆောက်အဦသစ် ဖွင့်ပွဲအခမ်းအနားသို့ တက်ရောက်ရာ တိုင်းဒေသကြီး ဝန်ကြီးချုပ်က အမှာစကားပြောကြားပြီး ခန္တှီးမြို့နယ် ဥပဒေအရာရှိမှ ရုံးအဆောက်အဦသစ်များ ဆောက်လုပ်ခြင်းလုပ်ငန်းများနှင့် ပတ်သက်၍ ရှင်းလင်းတင်ပြသည်။ ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီး ချုပ် ဦးဇော်ထူး၊ တိုင်းဒေသကြီး ဥပဒေချုပ် ဒေါ်လှလှဝင်း၊ တိုင်းဒေသကြီး ဥပဒေအရာရှိနှင့် ခန္တီးခရိုင် စီမံအုပ်ချုပ်ရေးအဖွဲ့ ဥက္ကဌတို့က ရုံးအဆောက်အဦသစ်အား ဖဲကြိုးဖြတ်ဖွင့်လှစ်ပေးကာ တာဝန်ရှိသူများအတူ စုပေါင်းမှတ်တမ်းတင် ဓာတ်ပုံရိုက်ကူးကာ ရုံးဆိုင်းဘုတ်အား အမွှေးနံ့သာရေများ ပတ်ဖျန်းပေးကြပြီး ရုံးအဆောက်အဦသစ်အတွင်း လိုက်လံကြည့်ရှု စစ်ဆေးခဲ့ကြသည်။

အဆိုပါ ခန္တီးခရိုင်/မြို့နယ် ဥပဒေရုံးအဆောက်အဦအား ခန္တီးမြို့၊ ဇီးဖြူကုန်းရပ်ကွက်တွင် တည်ဆောက်ပြီး အလျား(၉၆-ပေ)၊ အနံ(၃၆-ပေ) RC တစ်ထပ်အမျိုးအစားဖြစ်ပြီး ငွေလုံး ငွေရင်း ခွင့်ပြုရန်ပုံငွေကျပ် (၁၀၅)သန်းဖြင့် ဆောင်ရွက်ခဲ့ကြောင်း သိရသည်။

ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ခန္တီးမြို့နယ်၊ သာယာကုန်းကျေးရွာနှင့်အနီးဝန်းကျင်ရှိ ကျေးရွာများမှ ဒေသခံပြည်သူများအား ရင်းရင်းနှီးနှီးတွေ့ဆုံ နှုတ်ဆက်စကား ပြောကြားကာ ကိုဗစ်-၁၉ ရောဂါ ကာကွယ် ဆေးထိုးနှံပေးနေမှုနှင့် ခန္တီးမြို့၊ အမှတ် (၁)အခြေခံပညာ အထက်တန်းကျောင်းတွင် ဒေသခံကျောင်း၊ ကျောင်းသူများ တည်ငြိမ် အေးချမ်းစွာ   တက္ကသိုလ်ဝင်တန်း စာမေးပွဲဖြေဆိုနေမှုအား လိုက်လံကြည့်ရှုအားပေးကာ လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့သည်။

တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများသည် ယမန်နေ့တွင် နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့၊ အစိုးရနည်းပညာ အထက်တန်းကျောင်း ဆောက် လုပ်ရေးစီမံကိန်းသို့ ရောက်ရှိရာ အဆောက်အဦအထူးအဖွဲ့(၆)မှ တာဝန်ခံအင်ဂျင်နီယာမှ ပင်မေ ကျာင်းဆောင်အဆောက်အဦ တည်ဆောက်နေမှုများအား လိုက်လံရှင်းလင်းတင်ပြရာ တိုင်းဒေသကြီးဝန်ကြီးချုပ် ဦးမြတ်ကျော်က တည်ဆောက်ရေးလုပ်ငန်းများ အချိန်မီပြီးစီးရေး၊ စံချိန် စံညွှန်းမီ အရည်အသွေးကောင်းမွန်ရေး၊ လုပ်ငန်းခွင်အန္တရာယ် ကင်းရှင်းရေးတို့အား မှာကြားခဲ့သည်။

ဆက်လက်ပြီး  တိုင်းဒေသကြီး ဝန်ကြီးချုပ်နှင့် တာဝန်ရှိသူများက လဟယ်မြို့၊ အစိုးရနည်းပညာအထက်တန်းကျောင်း အလုပ်ရုံ(အလျား-၁၂၅ ပေ၊ အနံ- ၈၂ ပေ) Steel Structure (၁)ထပ် အဆောက်အဦ တည်ဆောက်နေမှုနှင့် (၄)ခန်းတွဲ၊ (၄)ထပ် ဝန်ထမ်းအိမ်ရာများ ဆောက်လုပ်နေမှုတို့အား လိုက်လံကြည့်ရှုစစ်ဆေးပြီး လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ကြောင်း သတင်းရရှိသည်။    

 

 

 

မုံရွာ ဧပြီ ၅
စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်သည် တိုင်းဒေသကြီး တရားသူကြီးချုပ် ဦးဇော်ထူးနှင့် တိုင်းဒေသကြီးအဆင့် ဌာနဆိုင်ရာအကြီးအကဲများ လိုက်ပါလျက် ဧပြီလ(၄) ရက်နေ့ နံနက်ပိုင်းတွင် ခန္တီးခရိုင်၊ နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့၊ ထေရဝါဒဗုဒ္ဒ သာသနာပြု(ဗဟို)ကျောင်းတိုက် ဆရာတော်ထံ သင်္ကန်း၊ ဆွမ်းဆန်စိမ်း၊ လှူဘွယ်ပစ္စည်းများနှင့် ဆွမ်းချက်ဆောင် အဆောက်အဦတည်ဆောက်ရန် သိန်း(၁၅၀-တစ်ရာ့ငါးဆယ်)နှင့် လဟယ်မြို့၊ သီလရှင်ကျောင်းတိုက် ဆွမ်းချက်ဆောင် အဆောက်အဦ တည်ဆောက်ရန်အတွက် အလှူငွေ ကျပ် သိန်း(၁၅၀-တစ်ရာငါးဆယ်)တို့အား ဆက်ကပ်လှူဒါန်းပြီး သာသနာရေးဆိုင်ရာများ လျှောက်ထားခဲ့ကြသည်။

ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် လဟယ်မြို့၊ နာဂရိုးရာပြတိုက်တွင် ကျင်းပသော မြို့နယ်အဆင့်ဌာနဆိုင်ရာများ၊ မြို့မိမြို့ဖများ၊ ဒေသခံတိုင်းရင်းသားများနှင့် တွေ့ဆုံပွဲအခမ်းအနားသို့ တက်ရောက်ရာ တိုင်းဒေသကြီး ဝန်ကြီးချုပ် ဦးမြတ်ကျော်က နယ်မြေတည်ငြိမ်အေးချမ်းရေးနှင့် တရားဥပဒေစိုးမိုးရေး၊  ပညာရေး၊ ကျန်းမာရေး၊ စိုက်ပျိုးမွေး မြူရေး၊ လမ်းပန်းဆက်သွယ်ရေးနှင့် ဒေသဖွံ့ဖြိုးရေး ဆောင်ရွက်ပေးနေမှု အခြေအနေများကို ရှင်းလင်း ပြောကြားသည်။

ဆက်လက်၍ လဟယ်ခရိုင်/မြို့နယ် စီမံအုပ်ချုပ်ရေးအဖွဲ့ ဥက္ကဌတို့က ခရိုင်/ မြို့နယ် ဆိုင်ရာ အချက်အလက်များ၊ ကိုဗစ်-၁၉ ရောဂါကာကွယ်ကုသရေး၊ ကာကွယ်ဆေးထိုးခြင်းနှင့် ပန်းခင်းစီမံချက်အရ နိုင်ငံသားစီစစ်ရေးကတ်ပြား ရရှိရေးဆောင်ရွက်ပေးနေမှုများနှင့် ပတ်သက်၍ ရှင်းလင်းတင်ပြကြသည်။

ဆက်လက်ပြီး တိုင်းဒေသကြီး ဝန်ကြီးချုပ် ဦးမြတ်ကျော်က လဟယ်မြို့နယ်၊ စီမံအုပ်ချုပ် ရေးအဖွဲ့ ဥက္ကဌထံ မြို့နယ်အဆင့်ဌာနဆိုင်ရာများအတွက် ငွေကျပ်(၁၀)သိန်းအား ပေးအပ်ပြီး ဒေသခံတိုင်းရင်းသားများကိုယ်စား နာဂရိုးရာအဖွဲ့ဥက္ကဌ ဦးမောင်ကုက ကျေးဇူးတင်စကား ပြန်လည်ပြော ကြားသည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်က ရှင်းလင်းတင်ပြချက်များ အပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးပြီး နိဂုံးချုပ်စကား ပြောကြားကာ အခမ်းအနားကို ရုပ်သိမ်းခဲ့ကြပြီး အခမ်းအနားသို့ တက်ရောက်လာကြသော ဌာနဆိုင်ရာများ၊ ဒေသခံတိုင်းရင်းသားများအား ရင်းရင်းနှီးနှီး လိုက်လံနှုတ်ဆက် အားပေးခဲ့ကြသည်။

ဆက်လက်ပြီး တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် လဟယ်မြို့၊ ပြည်သူ့ ဆေးရုံကြီးသို့ ရောက်ရှိရာ တိုင်းဒေသကြီး အစိုးရအဖွဲ့မှ ပေးအပ်သည့် အောက်ဆီဂျင် စက်ရုံနှင့်စက် တည်ဆောက်တပ်ဆင်နေမှုနှင့် ဒေသခံပြည်သူများအား ကိုဗစ်-၁၉ ရောဂါ ကာကွယ်ဆေးထိုနှံပေးနေမှုတို့အား ကြည့်ရှုအားပေးကာ ဆေးရုံဝန်ထမ်းများနှင့် လူနာများ အတွက် ငွေကျပ်(၅)သိန်းအား သူနာပြုဆရာမကြီးများထံ ပေးအပ်ခဲ့ကြသည်။

ထို့နောက် တိုင်းဒေသကြီး ဝန်ကြီးချူပ် ဦးမြတ်ကျော်နှင့် တာဝန်ရှိသူများသည် လဟယ်မြို့၊ အခြေခံပညာအထက်တန်းကျောင်းတွင် ဒေသခံကျောင်းသား၊ ကျောင်းသူများ အေးချမ်းတည်ငြိမ်စွာ တက္ကသိုလ်ဝင်တန်း စာမေးပွဲဖြေဆိုနေမှုအား ကြည့်ရှုအားပေးပြီး လိုအပ်သည်များကို တာဝန်ရှိသူ များနှင့် ဖြည့်ဆည်းပေါင်းစပ် ဆောင်ရွက်ပေးခဲ့သည်။

လဟယ်မြို့တွင် တက္ကသိုလ်ဝင်တန်း စာမေးပွဲဖြေဆိုသူ (၂၈၄)ဦး ဖြေဆိုခွင့်ရရှိပြီး ဖြေဆို သူ(၂၄၂)ဦး၊ ဖြေဆိုမှုရာခိုင်နှုန်း(၈၅%) ဖြေဆိုခဲ့ကြကြောင်း သတင်းရရှိသည်။



 

မတ် ၃၁
စစ်ကိုင်းတိုင်းဒေသကြီး ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေး လုပ်ငန်းညှိနှိုင်းအစည်းအဝေး(၁၀/၂၀၂၂)ကို မတ်လ(၃၁)ရက်နေ့ နံနက်(၉) နာရီအချိန်တွင် တိုင်းဒေသကြီး အစိုးရအဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီး ကိုဗစ်-၁၉ ရောဂါ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ အဖွဲ့ဝင်များ၊ တိုင်းဒေသကြီးအဆင့်ဌာန ဆိုင်ရာအကြီးအကဲများနှင့် တာဝန်ရှိသူများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က မိမိတို့တိုင်းဒေသကြီးတွင် ကိုဗစ်-၁၉ ရောဂါပိုး စစ်ဆေးတွေ့ရှိမှု လျော့နည်းသွားသော်လည်း ကျန်းမာရေးအသိဖြင့် လုပ်ကိုင်သွားလာ နေထိုင်ကြရမည် ဖြစ်ပါကြောင်း၊ ရောဂါပိုးကူးစက်ဖြစ်ပွားမှုနှင့် သေဆုံးမှုနှုန်း လျော့ချနိုင်ရေးအတွက် အဓိကကာကွယ်ပေးမှုမှာ ကိုဗစ်-၁၉ ရောဂါ ကာကွယ်ဆေး လူတိုင်းစေ့ ထိုးနှံပြီးစီးရန် အရေးကြီးပါကြောင်း၊ တိုင်းဒေသကြီးတစ်ခုလုံး၏ ဆေးထိုးနှံပြီးစီးမှုမှာ အခြား တိုင်းဒေသကြီးနှင့် ပြည်နယ်များထက် များစွာလျော့နည်းနေသေးပါ၍ လူတိုင်းစေ့ ဆေးထိုး ပြီးစီးရေးတို့ကို တာဝန်ရှိသူအားလုံးမှ အလေးအနက်ထားခံယူကာ ပူးပေါင်းဆောင်ရွက်ကြရန် အရေးကြီးနေပြီဖြစ်ပါကြောင်း၊ ကိုဗစ်-၁၉ ရောဂါ ကာကွယ်ဆေးထိုးနှံပေးမှုအား အခြေချထိုးနှံခြင်း၊ ရွှေ့လျားထိုးနှံခြင်းနှင့် ကျေးရွာများအထိပါ ကွင်းဆင်းထိုးနှံခြင်းများကို အရှိန်မြှင့်၍ သတ်မှတ်ကာလတွင် လျာထား ရည်မှန်းချက်ပြည့်မီအောင် ကြိုးပမ်းဆောင်ရွက်ရမည်ဖြစ်ပါကြောင်း၊ ဆောင်ရွက်မှုအားလုံးတွင် လုံခြုံရေးအသိ၊သတိတို့ဖြင့် ကြပ်မတ်ပေါင်းစပ်ဆောင်ရွက်သွားကြရန်လိုအပ်ပါကြောင်း ပြောကြားခဲ့သည်။

ယင်းနောက် အစည်းအဝေးသို့ တက်ရောက်လာကြသော တိုင်းဒေသကြီးအစိုးရအဖွဲ့ဝင် ဝန်ကြီးများ၊ ဌာနဆိုင်ရာများနှင့် တာဝန်ရှိသူများက နေ့စဉ်ရောဂါပိုး စစ်ဆေးတွေ့ရှိမှု ဆေးရုံတက်ရောက် ကုသမှုနှင့်ဆေးရုံဆင်းမှု၊ သတ်မှတ်လျာထားချက် ပြည့်မီအောင် ကာကွယ်ဆေးထိုးနှံမှုအခြေအနေများ၊ အောက်ဆီဂျင်ထုတ်လုပ်သုံးစွဲမှု၊ မြို့ဝင်မြို့ထွက်နေရာများတွင် ကျန်းမာရေးစစ်ဆေးရေး စခန်းများချထား၍ စစ်ဆေးဆောင်ရွက်နေမှု၊ လုံခြုံရေးဆောင်ရွက်ပေးနေမှု အခြေအနေများနှင့် ပတ်သက်၍ အသီးသီးအကြံပြု ဆွေးနွေး တင်ပြကြသည်။

ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်က ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေးနှင့် ကူးစက်မှုလျော့ချရေး လုပ်ငန်းများနှင့် ပတ်သက်၍ အသီးသီး ဆွေးနွေး တင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက် ပေးပြီး နိဂုံးချုပ်စကားပြောကြားကာ အစည်းအဝေးကို ရုပ်သိမ်းခဲ့ကြသည်။

မုံရွာ မတ် ၃၀
စစ်ကိုင်းတိုင်းဒေသကြီးအတွင်းရှိ စေတနာ့ဝန်ထမ်းများအား ဂုဏ်ပြုမှတ်တမ်းလွှာပေးအပ်ခြင်း အခမ်းအနားကို မတ်လ(၂၉)ရက်၊ မွန်းလွဲ(၁)နာရီအချိန်တွင် တိုင်းဒေသကြီးအစိုးရအဖွဲ့ရုံးဝန်းအတွင်းရှိ ချင်းတွင်းခန်းမတွင် ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီးချုပ် ဦးဇော်ထူးနှင့် အစိုးရအဖွဲ့ဝင်ဝန်ကြီးများ၊ တိုင်းဒေသကြီး ဥပဒေချုပ် ဒေါ်လှလှဝင်း၊ တိုင်းဒေသကြီးအဆင့် ဌာနဆိုင်ရာများ၊ လူမူရေးအသင်းအဖွဲ့ဝင်များ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က တိုင်းဒေသကြီးအတွင်း ကိုဗစ်-၁၉ ကူးစက်ရောဂါ ကာကွယ်ထိန်းချုပ်ရေးအတွက် စွမ်းစွမ်းတမံ ကူညီဆောင်ရွက်ပေးနေကြတဲ့ စေတနာ့ဝန်ထမ်းများရဲ့ စွမ်းဆောင်မှုဟာ လေးစားစရာကောင်းတဲ့ စွမ်းဆောင်မှုတွေပဲ ဖြစ်ပါကြောင်း၊ နိုင်ငံအတွက် ဂုဏ်ယူစရာကောင်းသလို စစ်ကိုင်းတိုင်းဒေသကြီးအတွက် ဆောင်ရွက် ပေးနေကြတဲ့အတွက်လည်း ကျေးဇူးတင်ရှိပါကြောင်း၊ တိုင်းဒေသကြီးအတွင်းရှိ စေတနာ့ဝန်ထမ်းများကို ကိုဗစ်-၁၉ ကာကွယ်တိုက်ဖျက်ရေးလုပ်ငန်းများမှာ စွမ်းဆောင်ပေးကြတာကို နိုင်ငံတော်က အသိအမှတ်ပြုတဲ့အနေနဲ့ ဂုဏ်ပြုမှတ်တမ်းလွှာများကို ပေးအပ်ခြင်းဖြစ်ပါကြောင်း၊ စေတနာ့ဝန်ထမ်း၊ ပရဟိတအဖွဲ့အစည်း၊ Volunteer များ ခရီးသွားလာရေးလွယ်ကူစေရန် Volunteer Name Card များကို ထုတ်ပေးထားပါကြောင်း၊ နိုင်ငံတော်အနေနှင့်လည်း စေတနာ့ဝန်ထမ်းများ၏ “ကိုယ်ကျိုးမဖတ် တိုင်းပြည်အတွက်”ဆိုတဲ့ စိတ်ဓာတ်ကို အရင်းခံကာ ကြိုးစားမှုကို အသိအမှတ်ပြုတဲ့အတွက် စက်သုံးဆီ၊ ကျန်းမာရေး အထောက်အကူပြုပစ္စည်းများနှင့် စားစရိတ်များကို ပံ့ပိုးပေးခဲ့ပါကြောင်း၊ စေတနာ့ဝန်ထမ်းများကလည်း တစ်နိုင်ငံလုံးကျန်းမာပြီး ရောဂါအပြင်းအထန်ဖြစ်ပွားမှုကို လျော့နည်းစေမည့် နည်းလမ်းဖြစ်တဲ့ ကာကွယ်ဆေးထိုးနှံပေးမည့် စုရပ်များမှာ ပိုမိုပါဝင်ကူညီ အားဖြည့်ပေးကြရန် လိုအပ်ပါကြောင်း ပြောကြားခဲ့သည်။

ဆက်လက်၍ တိုင်းဒေသကြီး လူမူဝန်ထမ်းဦးစီးဌာနမှ ညွှန်ကြားရေးမှူး ဒေါ်သန္တာထွေးက စေတနာ့ဝန်ထမ်းများနှင့် ပတ်သက်၍ ဆောင်ရွက်ပေးခဲ့မှုများကို Power Point ဖြင့် ရှင်းလင်း တင်ပြသည်။ ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်က မုံရွာခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများ ပေးအပ်ပြီး တိုင်းဒေသကြီး တရားသူကြီးချုပ် ဦးဇော်ထူးက ရွှေဘိုခရိုင်နှင့်ကန့်ဘလူခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများအား လည်းကောင်း၊ တိုင်းဒေသကြီး စီးပွား ရေးရာဝန်ကြီး ဒေါ်ရီရီသန်းက ယင်းမာပင်ခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများအား လည်းကောင်း အသီးသီးပေးအပ်ကြသည်။

ထို့နောက် တိုင်းဒေသကြီး သယံဇာတရေးရာဝန်ကြီး ဦးတင်သန်းဝင်းက စစ်ကိုင်းခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများအား လည်းကောင်း၊တိုင်းဒေသကြီး လူမူရေးရာဝန်ကြီး ဦးအေးလိူင်က ကလေးခရိုင်နှင့် တမူးခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများအား လည်း ကောင်း၊ တိုင်းဒေသကြီး ဥပဒေချုပ် ဒေါ်လှလှဝင်းက ကသာခရိုင်၊ ကောလင်းခရိုင် စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများအား လည်းကောင်း၊ တိုင်းဒေသကြီး လူမူဝန်ထမ်းဦးစီးဌာနမှ ညွှန်ကြားရေးမှူးက မော်လိုက်ခရိုင်ခရိုင်၊ ခန္တီးခရိုင်၊ နာဂကိုယ်ပိုင်အုပ်ချုပ်ခွင့်ရဒေသ စေတနာ့ဝန်ထမ်းများကိုယ်စား ကိုယ်စားလှယ်တစ်ဦးထံ ဂုဏ်ပြုမှတ်တမ်းလွှာများ အသီးသီး ပေးအပ်ကြသည်။

ဆက်လက်ပြီး တိုင်းဒေသကြီးအတွင်းရှိ စေတနာ့ဝန်ထမ်းများကိုယ်စား မုံရွာမြို့၊ ဂရုဏာမြင်းမိုရ် လူမူကူညီရေးအသင်းမှ ကိုယ်စားလှယ်တစ်ဦးက ကျေးဇူးတင်စကား ပြန်လည် ပြောကြားကာ အခမ်းအနားကို ရုပ်သိမ်းခဲ့ကြသည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများက အခမ်းအနားသို့ တက်ရောက်လာကြသော စေတနာ့ဝန်ထမ်း၊ လူမူရေးအသင်းအဖွဲ့ အစည်းများနှင့် Volunteer များအား ရင်းရင်းနှီးနှီး လိုက်လံနှုတ်ဆက်အားပေးခဲ့ကြောင်း သတင်းရရှိသည်။ 


 

မုံရွာ မတ် ၂၉
စစ်ကိုင်းတိုင်းဒေသကြီး၊ မြန်မာသက္ကရာဇ် ၁၃၈၃-ခုနှစ်၊ ၂၀၂၂-ခုနှစ်၊ မြန်မာ့ရိုးရာ ယဉ်ကျေးမှု မဟာသင်္ကြန်ပွဲတော် အောင်မြင်စွာကျင်းပနိုင်ရေး (ဒုတိယအကြိမ်) လုပ်ငန်းညှိနှိုင်း အစည်းအဝေးကို မတ်လ(၂၈)ရက်၊ မွန်းလွဲ(၁)နာရီအချိန်တွင် တိုင်းဒေသကြီးအစိုးရအဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသကြီးဥပဒေချုပ် ဒေါ်လှလှဝင်း၊ တိုင်းဒေသကြီးအစိုးရအဖွဲ့ အတွင်းရေးမှူး ဦးခင်မောင်ဆန်း၊ တိုင်းဒေသကြီးအဆင့် ဌာနဆိုင်ရာများ၊ မုံရွာခရိုင်/မြို့နယ်စီမံအုပ်ချုပ်ရေးအဖွဲ့ ဥက္ကဌများ၊ မြို့မိ၊မြို့ဖများနှင့် လုပ်ငန်းရှင်များ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က စစ်ကိုင်းတိုင်းဒေသကြီး မြန်မာ့ ရိုးရာယဉ်ကျေးမှု မဟာသင်္ကြန်ပွဲတော်အား စည်စည်ကားကား ကျင်းပနိုင်ရေးအတွက် တာဝန်ရှိသူများက အလေးအနက်ထားကာ ပြင်ဆင်ဆောင်ရွက်ကြစေလိုပါကြောင်း၊ ၂၀၂၀နှင့်၂၀၂၁ ခုနှစ်တို့တွင် မဟာသင်္ကြန်ပွဲတော် မကျင်းပနိုင်ခဲ့ခြင်းနှင့် ကိုဗစ်-၁၉ ကူးစက်ရောဂါကြောင့် သွားလာနေထိုင်မှု ဆင်ခြင်ခဲ့ရသည့် ပြည်သူများ၏ မွန်းကြပ်မှုများပြေပျောက်ပြီး စိတ်ပျော်ရွှင် အောင် ဆောင်ရွက်ရမည် ဖြစ်ပါကြောင်း၊  တာဝန်ရှိသူများအနေဖြင့် ကော်မတီများဖွဲ့စည်းကာ ပူးပေါင်းဆောင်ရွက်ရမည်ဖြစ်ပါကြောင်း၊ မြန်မာ့ရိုးရာယဉ်ကျေးမှု မဟာသင်္ကြန်ပွဲတော်ကို ရိုးရာယဉ်ကျေးမှု အစဉ်အလာနှင့်အညီ စည်းကားသိုက်မြိုက်စွာ ကျင်းပနိုင်ရေး တာဝန်ရှိသူများက ဝိုင်းဝန်းပူးပေါင်း ဆောင်ရွက်ကြရန် လိုအပ်ပါကြောင်း၊ လုပ်ငန်းများဆောင်ရွက်ရာတွင် ကျန်းမာရေးနှင့် လုံခြုံရေးအသိ၊သတိတို့ဖြင့် ဆောင်ရွက်သွားရမည်ဖြစ်ပါကြောင်း၊ မိမိတို့ တိုင်းဒေသ ကြီးအစိုးရအဖွဲ့ အနေဖြင့်လည်း လုပ်ငန်းများဆောင်ရွက်ရာတွင် လိုအပ်သည်များကို ဖြည့်ဆည်း ပေါင်းစပ်ဆောင်ရွက်ပေးသွားမည်ဖြစ်ပါကြောင်း ပြောကြားခဲ့သည်။

ဆက်လက်၍ မြန်မာ့ရိုးရာယဉ်ကျေးမှု မဟာသင်္ကြန်ပွဲတော် အောင်မြင်စွာ ကျင်းပနိုင်ရေးအတွက် မဏ္ဍပ်တာဝန်ခံများက ဖျော်ဖြေရေးအကမဏ္ဍပ်၊ ရေကစားမဏ္ဍပ်များ ဆောက်လုပ်မည့်အခြေအနေများနှင့် လုပ်ငန်းကော်မတီများအလိုက် တာဝန်ခွဲဝေချထားမှု၊ စတုဒီသာမဏ္ဍပ်များ ဆောက်လုပ်မည့် အခြေအနေများအား ရှင်းလင်းတင်ပြပြီး လုပ်ငန်းရှင်များက မြန်မာ့ရိုးရာ ယဉ်ကျေးမှု မဟာသင်္ကြန်ပွဲတော် စည်ကားသိုက်မြိုက်စွာ ကျင်းပနိုင်ရေးအတွက် မိမိတို့အနေဖြင့် ပူးပေါင်းဆောင်ရွက်သွားမည့် လုပ်ငန်းများအား ရှင်းလင်းတင်ပြကြသည်။

ဆက်လက်၍ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသကြီးအဆင့်ဌာနဆိုင်ရာများက မြန်မာ့ရိုးရာ ယဉ်ကျေးမှုမဟာသင်္ကြန်ပွဲတော် ကျင်းပနိုင်ရေးအတွက် လိုအပ်သည်များကို ဆွေးနွေးတင်ပြကြကာ အစည်းအဝေးသို့ တက်ရောက်လာသူများက အထွေထွဆွေးနွေး တင်ပြကြသည်။

ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်က မြန်မာ့ရိုးရာယဉ်ကျေးမှု မဟာသင်္ကြန်ပွဲတော် ကျင်းပနိုင်ရေးအတွက် အသီးသီးဆွေးနွေး တင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးကာ နိဂုံးချုပ်စကား ပြောကြားပြီး အစည်းအဝေးကို ရုပ်သိမ်းခဲ့ကြောင်း သတင်းရရှိသည်။


 

မတ် ၂၈
စစ်ကိုင်းတိုင်းဒေသကြီး အစိုးရအဖွဲ့၏ ကြီးကြပ်မှုဖြင့် လူငယ်များဘက်စုံဖွံ့ဖြိုးတိုးတက်ရေးအသိပညာပေး ဟောပြောပွဲနှင့် နွေရာသီသင်တန်းများ ဖွင့်ပွဲအခမ်းအနားကို မတ်လ (၂၈)ရက်၊ နံနက်ပိုင်းတွင် မုံရွာမြို့၊ အလုံတပ်မြို့အမှတ်(၂)အခြေခံပညာ အထက်တန်းကျောင်း ခန်းမတွင် ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ အနောက် မြောက်တိုင်းစစ်ဌာနချုပ်တိုင်းမှူး ဗိုလ်မှူးချုပ် သန်းထိုက်၊ တိုင်းဒေသကြီး တရားသူကြီးချုပ်နှင့် အစိုးရအဖွဲ့ဝင်များ၊ တပ်မတော်အရာရှိကြီးများ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများနှင့် ဝန်ထမ်းများ၊ ဆရာ/ဆရာမများ၊ ကျောင်းသား၊ ကျောင်းသူများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က မိဘနှင့်ဆရာများက သားသမီး တပည့်များကို ဗလငါးတန်နှင့်ပြည့်စုံပြီး တိုင်းပြည်ကအားထားရသော လူတော်လူကောင်းများ စိတ်ရင်းစိတ်ထားကောင်းကောင်းဖြင့် အများအကျိုးသယ်ပိုးလိုသော စိတ်ကောင်းစေတနာ ကောင်းရှိသူများ ဖြစ်စေချင်ကြပါကြောင်း၊ ကျောင်းသား ကျောင်းသူများသည် ကာယ၊ဉာဏ၊ စာရိတ္တ ဘက်စုံဖွံ့ဖြိုးတိုးတက်ခြင်းနှင့် မျိုးချစ်စိတ်ဓာတ်ရှင်သန်ထက်မြတ်ပြီး ယဉ်ကျေးလိမ္မာသော သားငယ်သမီးငယ်များဖြစ်လာစေရန် အခြေခံပညာကျောင်းများသည် အဓိကတာဝန်ဖြစ်ပါကြောင်း၊ အခြေခံပညာကျောင်းများမှ ဆရာ၊ဆရာမများသည် ယခုလိုနွေရာသီကျောင်းပိတ်ရက် ကာလများကို ကျောင်းသား၊ကျောင်းသူများအတွက် အချိန်ကိုအကျိုးရှိစွာအသုံးပြု၍ ဟောပြောပွဲနှင့် သင်တန်းများဖွင့်လှစ်ပို့ချပေးခြင်းဖြင့် နိုင်ငံတော်ကအားကိုးအားထားရသော နိုင်ငံသားကောင်းများစွာ ပေါ်ထွန်းလာမည်ဟု ယုံကြည်ပါကြောင်း၊ ကျောင်းသားကျောင်းသူများ အနေဖြင့်လည်း ကျောင်းပိတ်ရက်အချိန်ကို အကျိုးရှိစွာဖြင့်အသုံးချ၍ မိမိတို့အလိုရှိသော ပညာရပ်များကို စိတ်ပါဝင်စားစွာ လေ့လာသွားကြရန် လိုအပ်ပါကြောင်း ပြောကြားခဲ့သည်။ 

ယင်းနောက် တိုင်းဒေသကြီး ပညာရေးဦးစီးမှူး ဦးတိုးဝင်းက ဟောပြောပွဲနှင့် သင်တန်း များဖွင့်လှစ်ရခြင်းနှင့် ပတ်သက်၍ ရှင်းလင်းပြောကြားပြီး ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊တိုင်းဒေသကြီး ညွှန်ကြားရေးမှူး ဒေါ်ခင်စောလင်းက လူငယ်များစာရိတ္တမြင့်မားရေး နှင့် မျိုးချစ်စိတ်ဓာတ် အကြောင်းအရာများအား ဟောပြောခဲ့ကြသည်။ 

ဆက်လက်ပြီး တိုင်းဒေသကြီး ဝန်ကြီးချုပ် ဦးမြတ်ကျော်က သင်တန်းသား၊ သင်တန်းသူများအတွက် ငွေကျပ်(၅)သိန်းအားပေးအပ်ခဲ့ရာ အလုံတပ်မြီု့ အမှတ်(၂) အခြေခံပညာ အထက်တန်းကျောင်း၊ ကျောင်းအုပ်ကြီးက လက်ခံရယူပြီး အနောက်မြောက်တိုင်း စစ်ဌာနချုပ် တိုင်းမှူးဗိုလ်မှူးချုပ် သန်းထိုက်က အားကစားပစ္စည်းများ ထောက်ပံ့ပေးအပ်ရာ ဆရာမ တစ်ဦးက လက်ခံရယူခဲ့ပြီး အခမ်းအနားကို ရုပ်သိမ်းခဲ့ကြသည်။

ထို့နောက် တိုင်းဒေသကြီး ဝန်ကြီးချုပ်၊ တိုင်းမှူးနှင့် တာဝန်ရှိသူများသည် ပြန်ကြားရေး နှင့် ပြည်သူ့ဆက်ဆံရေးဦးစီးဌာနမှ ခင်းကျင်းပြသထားသာ နံရံကပ်ဓာတ်ပုံများနှင့် စာအုပ်၊ စာစောင်များအား လိုက်လံကြည့်ရှုအားပေးပြီး အလုံအမှတ်(၂) အခြေခံပညာအထက်တန်း ကျောင်းရှိ ကျောင်းသား၊ ကျောင်းသူများ ကွန်ပျူတာအခြေခံ၊ ဗုဒ္ဓဘာသာယဉ်ကျေးမှုနှင့် အင်္ဂလိပ်စကားပြောအခြေခံ သင်ကြားနေမှုများအား ကြည့်ရှုအားပေးကာ လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ကြောင်း သတင်းရရှိသည်။ 


          

သတင်း အချက်အလက်