မုံရွာ နိုဝင်ဘာ ၁၅
စစ်ကိုင်းတိုင်းဒေသကြီး ကလေးအလုပ်သမားပပျောက်ရေးကော်မတီ လုပ်ငန်းညှိနိုုင်း အစည်းအဝေး (၂/၂၀၂၁)ကို နိုဝင်ဘာလ (၁၅)ရက်၊ နံနက်(၁၀)နာရီအချိန်တွင် တိုင်းဒေသကြီး အစိုးရအဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသကြီးအဆင့် ဌာနဆိုင်ရာအကြိး အကဲများ၊ တိုင်းဒေသကြီး ကလေးအလုပ်သမားပပျောက်ရေး ကော်မတီ အတွင်းရေမှူးများနှင့် အဖွဲ့ ဝင်များ၊ တာဝန်ရှိသူများ တက်ရောက်ကြသည်။

ရှေးဦးစွာ တိုင်းဒေသကြီးဝန်ကြီးချုပ်ဦးမြတ်ကျော်က အမှာစကား ပြောကြားရာတွင် “ စစ်ကိုင်းတိုင်းဒေသကြီးအတွင်းရှိ မြို့နယ်များတွင် ကလေးသူငယ်များ၏ အကောင်းဆုံးအကျိုး စီးပွားကို ပိုမိုဖော်ဆောင်သွားနိုင်ရေးအတွက် အသိပညာပေးခြင်းနှင့် အလုပ်ရုံဆွေးနွေးပွဲများကို ဆောင်ရွက်သွားမည်ဖြစ်ပါကြောင်း၊ ပြစ်မှုကျူးလွန်ခြင်းကြောင့် နစ်နာသူကလေးငယ်များအတွက် လိုအပ်သော ဥပဒေဆိုင်ရာအထောက်အကူရရှိရန်အတွက် ဌာနအချင်းချင်းချိတ်ဆက်၍ ဆက်လက်ဆောင်ရွက်ပေးသွားရမှာ ဖြစ်ပါကြောင်း၊ အဆိုးဝါးဆုံးပုံစံဖြင့် ခိုင်းစေခြင်းခံရသော ကလေးအလုပ်သမားများအား ဖယ်ရှားခြင်းနှင့် သက်မွေးဝမ်းကျောင်းပညာသင်တန်းများတက်ရောက်စေပြီး ဘ၀ရေရှည်ရပ်တည်နိုင်အောင် ဆောင်ရွက်ပေးခြင်း စတဲ့လုပ်ငန်းများကို ကော်မတီအားလုံးက ဆောင်ရွက်သွားရန် လိုအပ်ပါကြောင်း၊ ကလေးသူငယ်များကို ဥပဒေအရ အကာအကွယ်ပြုထားတဲ့အတွက် ပြည်သူလူထုအနေနဲ့လည်း ကလေးသူငယ် ဥပဒေပါပြဌာန်းချက်များ တားမြစ်ချက်များကို သိရှိရန် ဆွေးနွေးပညာပေးမှုများ ပြုလုပ်ရန်လိုအပ်ပါကြောင်း ” ပြောကြားခဲ့သည်။

ဆက်လက်၍ ကလေးအလုပ်သမားပပျောက်ရေး ကော်မတီအသီးသီးမှ အတွင်းရေးမှူးများက မိမိတို့ကော်မတီများအလိုက် ဆောင်ရွက်နေသည့် လုပ်ငန်းများနှင့် ဆက်လက်ဆောင်ရွက်မည့် လုပ်ငန်းများအား အသီးသီးဆွေးနွေးတင်ပြကြပြီး အစည်းအဝေးသို့ တက်ရောက်လာကြသော တိုင်းဒေသကြီးအစိုးရအဖွဲ့ဝင် ဝန်ကြီးများနှင့် ကလေးအလုပ်သမားပပျောက်ရေး ကော်မတီအဖွဲ့ဝင်များက ကလေးအလုပ်သမားပပျောက်ရေးအတွက် ကလေးသူငယ်များ အလုပ်အကိုင်အခွင့်အလမ်းများရရှိစေရေး အသက်မွေးဝမ်းကြောင်းသင်တန်းများ ဖွင့်လှစ်သင်ကြားမည့် လုပ်ငန်းများ၊ အသိပညာပေး လုပ်ငန်းများ၊ ဥပဒေဆိုင်ရာလုပ်ငန်းများနှင့် ပတ်သက်၍ အထွေထွေ အကြံပြုဆွေးနွေးတင်ပြကြ သည်။

ထိုနောက် တိုင်းဒေသကြီးဝန်ကြီးချုပ်ဦးမြတ်ကျော်က အသီးသီး ဆွေးနွေးတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးပြီး နိဂုံးချုပ်စကားပြောကြားကာ အစည်းအဝေးကို ရုပ်သိမ်းခဲ့ကြသည်။

ဆက်လက်ပြီး တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများသည် မွန်းလွဲပိုင်းတွင် တိုင်းဒေသကြီးအစိုးရအဖွဲ့ရုံး အစည်းအဝေးခန်းမတွင် ကျင်းပသော (၇၅)နှစ်မြောက် စိန်ရတု ပြည်ထောင်စုနေ့ အထိမ်းအမှတ် ဂုဏ်ပြုတေးသီချင်းသီဆိုမှု ပြိုင်ပွဲအတွက် တိုင်းဒေသကြီးအဆင့် လူရွေးချယ်မှု လုပ်ငန်းညှိနိုုင်းအစည်းအဝေးသို့ တက်ရောက်ကြသည်။

ရှေးဦးစွာတိုင်းဒေသကြီး ဝန်ကြီးချုပ် ဦးမြတ်ကျော်ကအမှာစကား ပြောကြားပြီး တိုင်းဒေသကြီး သယံဇာတရေးရာဝန်ကြီး ဦးတင်သန်းဝင်းနှင့် တိုင်းရင်းသားရေးရာ ဝန်ကြီး ဦးစိုင်းနိုင်နိုင်ကျော် တို့က (၇၅)နှစ်မြောက် စိန်ရတုပြည်ထောင်စုနေ့ အထိမ်းအမှတ် ဂုဏ်ပြုတေး သီချင်းသီဆိုမှုပြိုင်ပွဲ အောင်မြင်စွာကျင်းပနိုင်ရေးအတွက် ကြိုတင်ပြင်ဆင်ဆောင်ရွက်ထားရှိမှုများအား ရှင်းလင်းတင်ပြ ကြပြီး အနုပညာရှင်ကြီးများနှင့် အသင်းအုပ်ချုပ်သူများက ပြိုင်ပွဲစည်းမျဉ်းစည်းကမ်းများနှင့် အုပ်ချုပ်မှု ပိုင်းဆိုင်ရာ လိုအပ်ချက်များအား အသီးသီးဆွေးနွေး တင်ပြကြသည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်က အသီးသီးဆွေးနွေး တင်ပြချက် များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးခဲ့ကြောင်း သတင်းရရှိသည်။

မုံရွာ နိုဝင်ဘာ ၁၃

စစ်ကိုင်းတိုင်းဒေသကြီး မြန်မာ့သိုင်း ဒိုင်လူကြီး/နည်းပြ သင်တန်းဆင်းပွဲ အခမ်းအနားကို နိဝင်ဘာလ (၁၂)ရက်၊ နံနက်ပိုင်းတွင် မုံရွာမြို့၊ ပြည်သူ့အားကစားကွင်းအတွင်းရှိ ဖူဆယ်အားကစား ရုံတွင်ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ မြန်မာ့သိုင်းချစ်မြတ်နိုး သူများ၊ သင်တန်းသား၊ သင်တန်းသူများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က အဖွင့်အမှာစကား ပြောကြားရာ တွင် “ စစ်ကိုင်းတိုင်းဒေသကြီးအတွင်း မြန်မာ့သိုင်းအားကစားနည်း ပိုမိုဖွံ့ဖြိုးတိုးတက်ရေးအတွက် မြန်မာ့သိုင်းဒိုင်လူကြီး/ နည်းပြသင်တန်းကို ဖွင့်လှစ်ခြင်းဖြစ်ပါကြောင်း၊ မြန်မာ့သိုင်းအားကစားနည်းဟာ မြန်မာလူမျိုးတို့ရဲ့ ယဉ်ကျေးမှုနှင့် ယှဉ်တွဲလာတဲ့ ရိုးရာအမွေအနှစ်ကိုယ်လုံပညာ အားကစားနည်း တစ်ခုဖြစ်ပါကြောင်း၊ မြန်မာ့သိုင်းပညာကို သင်ကြားခြင်းဖြင့် မိမိကိုယ်ကိုခုခံကာကွယ်နိုင်ပြီး ခန္ဓာကိုယ် ကျန်းမာကြံ့ခိုင်လာ၍ စိတ်ပျော်ရွှင်လန်းဆန်းကာ ရောဂါဘယများလည်း ကင်းဝေးစေမှာ ဖြစ်ပါကြောင်း၊ ယခုတက်ရောက်လာတဲ့ သင်တန်းသား/ သင်တန်းသူများ သည် တိုင်းဒေသကြီးမှ အားကိုး အားထားပြုရသော ဒိုင်လူကြီးများ၊ ထူးချွန်ထက်မြက်သော မျိုးဆက်သစ် အားကစားသမားများ လေ့ကျင့်မွေးထုတ်ပေးနိုင်သော နည်းပြဆရာကောင်းများ၊ တိုင်းဒေသကြီးရဲ့ဂုဏ်ကို မြန်မာ့သိုင်း အားကစားဖြင့် မြင့်တင်နိုင်သူများ ဖြစ်ကြပါစေလိုကြာင်း “ ပြောကြားခဲ့သည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်က သင်တန်းနည်းပြများထံ ဂုဏ်ပြုငွေ၊ အမှတ်တရလက်ဆောင်များနှင့် သင်တန်းသား၊သင်တန်းသူများ ကိုယ်စား သင်တန်းသား တစ်ဦးထံ သင်တန်းဆင်းလက်မှတ်များ ပေးအပ်ချီးမြင့်ခဲ့သည်။

ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်နှင့် တာဝန်ရှိသူများက မြန်မာ့ သိုင်း ဗန်တိုလက်နက်မဲ့၊ ဗန်ရှည် တုတ်၊ဓါး၊ကြိုး သရုပ်ပြသမှုအား ကြည့်ရှုအားပေးပြီး စုပေါင်းမှတ် တမ်းတင်ဓါတ်ပုံရိုက်ကူးကာ အခမ်းအနားကို ရုပ်သိမ်းခဲ့ကြောင်း သတင်းရရှိသည်။

မုံရွာ နိုဝင်ဘာ ၁၀

 စစ်ကိုင်းတိုင်းဒေသကြီးအတွင်း ၂၀၂၀-၂၀၂၁ ခု ဘဏ္ဍာရေးနှစ်တွင် ကောက်ခံရန်ကျန်ရှိသည့် အခွန်အခများနှင့် ၂၀၂၁-ခုနှစ်၊ အောက်တိုဘာလမှ ၂၀၂၂-ခုနှစ်၊ မတ်လအထိ (၆)လဘတ် ဂျက်တွင် ဆောင်ရွက်မည့် တင်ဒါလုပ်ငန်းများနှင့် ပတ်သက်၍ လုပ်ငန်းညှိနှိုင်းအစည်းအဝေးကို နိုဝင်ဘာလ (၁၀)ရက်၊ နံနက်(၁၀)နာရီအချိန်တွင် တိုင်းဒေသကြီးအစိုးရအဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီးအဆင့်ဌာနဆိုင်ရာ အကြီးအကဲများ၊ မုံရွာခရိုင်/ စစ်ကိုင်းခရိုင် စီမံအုပ်ချုပ်ရေးအဖွဲ့ဥက္ကဌများ၊ Video Conferencing စနစ်ဖြင့် တက်ရောက်ကြသော ကလေးခရိုင်/ ကသာခရိုင်/ ကန့်ဘလူခရိုင်/ ယင်းမာပင်ခရိုင်/ ခန္တီးခရိုင်/ ရွှေဘိုခရိုင်/ မော်လိုက်ခရိုင်/ တမူးခရိုင်/ နာဂကိုယ်ပိုင်အုပ်ချုပ်ခွင့်ရဒေသများမှ စီမံအုပ်ချုပ်ရေးအဖွဲ့ ဥက္ကဌများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က အဖွင့်အမှာစကား ပြောကြားရာတွင်   “ နိုင်ငံတော်ဖွံ့ဖြိုးတိုးတက်ရေးအတွက် ဘဏ္ဍာငွေတောင့်တင်းခိုင်မာရေးသည် အဓိကကျသော လိုအပ်ချက်ဖြစ်ပါကြောင်း၊ ၂၀၂၀-၂၀၂၁ ခုဘဏ္ဍာနှစ်တွင် အကြောင်းအရပ်ရပ်အရ မကောက်ခံခဲ့သည့် အခွန်အခများအား ပြန်လည်ကောက်ခံသွားရန် လိုအပ်ပါကြောင်း၊ ၂၀၂၁-၂၀၂၂ ခုဘဏ္ဍာနှစ်တွင်လည်း  နိုင်ငံတော်မှ ရသင့်ရထိုက်သော အခွန်အခများ အပြည့်အ၀ကောက်ခံ ရရှိရေးအတွက် ယခုဘဏ္ဍာနှစ် Mini Budget ကို နှစ်အစမှစပြီး မိမိတို့စီမံကွပ်ကဲရာ ခရိုင်/မြို့နယ် ဌာနဆိုင်ရာများကို မျက်ခြေမပြတ်စစ်ဆေးကြည့်ရှုပြီး အလေးအနက်ထားကာ ဌာနဆိုင်ရာအချင်းချင်း ပူးပေါင်းဆောင်ရွက်ကြရန်လိုအပ်ပါကြောင်း၊  တင်ဒါခေါ်ယူဆောင်ရွက်တဲ့ တည်ဆောက်ရေးလုပ်ငန်းများကို သက်ဆိုင်ရာဘဏ္ဍာနှစ်အတွင်း သက်မှတ်အရည်အသွေးဖြင့်ပြီးစီးအောင် ဆောင်ရွက်ကြရမှာဖြစ်ပါကြောင်း၊ ၂၀၂၁ ခုနှစ်၊ အောက်တိုဘာလမှ ၂၀၂၂ ခုနှစ်၊ မတ်အထိ(၆)လ ဘတ်ဂျက်ဟာ ကြားကာလဘတ်ဂျက်ဖြစ်သည့်အတွက် ဘဏ္ဍာရေးနှစ် ကျော်လွန်သုံးစွဲခွင့်ပြုမည့်ကိစ္စတွေလည်း ရှိမှာမဟုတ်ပါကြောင်း၊ မူလလျာထားသည့်လုပ်ငန်းအတိုင်း မဆောင်ရွက်နိုင်လို့ ရန်ပုံငွေလွှဲပြောင်းသုံးစွဲမည့် ကိစ္စရပ်များကို ဘဏ္ဍာရေးနှစ် ကုန်ဆုံးခါနီးမှ လွှဲပြောင်းခြင်းမပြုဘဲ စောစီးစွာတင်ပြဆောင်ရွက်ကြရန် ” ပြောကြားခဲ့သည်။

ဆက်လက်ပြီး တိုင်းဒေသကြီးအဆင့် ဌာနဆိုင်ရာများမှ မိမိတို့တာဝန်ယူဆောင်ရွက်လျက်ရှိသော အခွန်အခကောက်ခံရရှိမှု၊ ကောက်ခံရန်ကျန်ရှိမှုနှင့် ဆက်လက်ဆောင်ရွက်မည့် လုပ်ငန်းစနစ်များနှင့် တင်ဒါဆောင်ရွက်မည့် လုပ်ငန်းများနှင့်ပတ်သက်၍ အသီးသီးတင်ပြဆွေးနွေးကြပြီး တိုင်းဒေသကြီးအတွင်းရှိ ခရိုင်စီမံအုပ်ချုပ်ရေးအဖွဲ့ ဥက္ကဌများမှလည်း မိမိတို့ခရိုင်အတွင်းရှိ မြို့နယ်များတွင် အခွန်အခကောက်ခံ ရရှိမှုနှင့် ကောက်ခံရန်ကျန်ရှိသည့် လုပ်ငန်းများနှင့် ပတ်သက်၍ ဆွေးနွေးတင်ပြကြသည်။

ယင်းနောက် တိုင်းဒေသကြီး အစိုးရအဖွဲ့ဝင်ဝန်ကြီးများနှင့် တာဝန်ရှိသူများက တိုင်းဒေသကြီးအတွင်း အခွန်အခကောက်ခံရရှိမှု၊ကောက်ခံရန်ကျန်ရှိမှုနှင့် ဆက်လက်ဆောင်ရွက်မည့်လုပ်ငန်းစနစ်များနှင့် တင်ဒါဆောင်ရွက်မည့် လုပ်ငန်းများနှင့် ပတ်သက်၍ အသီးသီး အကြံပြုဆွေးနွေးကြသည်။

ထို့နောက် တိုင်းဒေသကြီး ဝန်ကြီးချုပ်ဦးမြတ်ကျော်က အခွန်အခကောက်ခံရရှိမှု၊ ကောက်ခံရန်ကျန်ရှိသည့် အခွန်အခများအပေါ် ဆက်လက်ဆောင်ရွက်မည့် လုပ်ငန်းစနစ်များနှင့် တင်ဒါဆောင်ရွက်မည့် လုပ်ငန်းများနှင့် ပတ်သက်၍ အသီးသီးအကြံပြု ဆွေးနွေးတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ပြီး နိဂုံးချုပ်စကားပြောကြားကာအစည်းအဝေးကိုရုပ်သိမ်းခဲ့ကြောင်းသတင်းရရှိပါသည်။

မုံရွာ နိုဝင်ဘာ ၁၄
စစ်ကိုင်းတိုင်းဒေသကြီး ၂၀၂၁-ခုနှစ်၊ (၁၃၈၃-ခုနှစ်) စုပေါင်းမဟာဘုံကထိန် အလှူတော် မင်္ဂလာအခမ်းအနားကို နိုဝင်ဘာလ(၁၄)ရက် နံနက်(၉)နာရီအချိန်တွင် တိုင်းဒေသကြီးအစိုးရအဖွဲ့ရုံး ဝန်းအတွင်းရှိ ချင်းတွင်းခန်းမတွင် ကျင်းပရာ အခမ်းအနားသို့ တိုင်းဒေသကြီးအစိုရအဖွဲ့ ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသကြီး/ခရိုင်/မြို့နယ် အဆင့်ဌာန ဆိုင်ရာများ၊ ဖိတ်ကြားထားသောဧည့်သည်တော်များ တက်ရောက်ကြသည်။

ရှေးဦးစွာ အခမ်းအနားကို နမောတဿ သုံးကြိမ်ရွတ်ဆို ဘုရားကန်တော့၍ ဖွင့်လှစ်ကြပြီး နိုင်ငံတော်သြဝါဒါစရိယ မုံရွာမြို့၊ ဓမ္မပါရဂူပါဠိတက္ကသိုလ်ကျောင်းတိုက် ပဓာနနာယက အဘိဓဇ မဟာ ရဌဂုရု ဘဒ္ဒန္တ အရိယာလင်္ကာရ ဆရာတော်ကြီးထံတော်မှ တိုင်းဒေသကြီး ဝန်ကြီးချုပ် ဦးမြတ်ကျော်နှင့် ဧည့်ပရိတ်သက်များက ရှစ်ပါးသီလခံယူဆောက်တည်ကြသည်။

ယင်းနောက် ဆရာတော်၊ သံဃာတော်များထံတော်မှ တိုင်းဒေသကြီး ဝန်ကြီးချုပ် ဦးမြတ်ကျော်နှင့် ဧည့်ပရိတ်သက်များက ပရိတ်တရားတော်မြတ်အား နာယူကြည်ညိုပြီး တိုင်းဒေသ ကြီး ဝန်ကြီးချုပ် ဦးမြတ်ကျော်က သာသနာရေးဆိုင်ရာများ လျှောက်ထားသည်။

ဆက်လက်၍ ဆရာတော်၊ သံဃာတော်များထံ တိုင်းဒေသကြီး ဝန်ကြီးချုပ် ဦးမြတ်ကျော် နှင့် တာဝန်ရှိသူများက ကထိန်လျာမြတ်သင်္ကန်းနှင့် လှူဖွယ်ပစ္စည်းများအား အသီးသီးဆက်ကပ် လှူဒါန်းကြပြီး မုံရွာမြို့၊ အုတ်ကန်တောရစာသင်တိုက် ပဓာနနာယက၊ စစ်ကိုင်းတိုင်းဒေသကြီး သံဃနာယကအဖွဲ့ ဥက္ကဌ၊ အဂ္ဂမဟာဂန္တဝါစကပဏ္ဍိတ ဘဒ္ဒန္တ မာနိတ ဆရာတော်ကြီးထံတော်မှ အနုမော ဒနာ တရားနာယူကြည်ညိုပြီး လှူဒါန်း မှုအစုစုတို့အတွက် ရေစက်သွန်းချအမျှပေးဝေကာ အခမ်းအနား မှူးမှ ဆရာတော်ကြီးများ၏ မဲကျသောပဒေသာပင်စာရင်းအား ဖတ်ကြားလျှောက်ထားသည်။

ထို့နောက် ဆရာတော်၊ သံဃာတော်များ၊ တိုင်းဒေသကြီး ဝန်ကြီးချုပ်နှင့် ဧည့်ပရိတ်သတ် များက “ ဗုဒ္ဓသာသနံ စိရံ တိဌတု ” သုံးကြိမ်ရွတ်ဆို ဆုတောင်း၍ အခမ်းအနားအား ရုပ်သိမ်းခဲ့ကြပြီး ဆရာတော်၊သဃာတော်များအား နေ့ဆွမ်းများဆက်ကပ် လှူဒါန်းခဲ့ကြသည်။

အဆိုပါ ၂၀၂၁-ခုနှစ်၊ စစ်ကိုင်းတိုင်းဒေသကြီး စုပေါင်းမဟာဘုံကထိန် အလှူတော်မင်္ဂလာ အခမ်းအနားတွင် တိုင်းဒေသကြီးအစိုးရအဖွဲ့နှင့် တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ စုပေါင်း၍ မုံရွာမြို့ပေါ်ရှိ ကျောင်းတိုက်ပေါင်း - ၃၃ ကျောင်းအား ပဒေသာပင် - ၄၅ ပင်စုစုပေါင်း တန်ဘိုးငွေကျပ် - ၂၉၃၅၇၉၅၀ (နှစ်ရာကိုးဆယ်သုံးသိန်း ငါးသောင်းခုနှစ်ထောင့် ကိုးရာငါးဆယ်) ကျပ်အား ဆက်ကပ်လှူဒါန်းခဲ့ကြောင်း သတင်းရရှိသည်။

မုံရွာ နိုဝင်ဘာ ၁၁

စစ်ကိုင်းတိုင်းဒေသကြီး ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေး လုပ်ငန်းညှိနှိုင်း အစည်းအဝေး(၃၇/၂၀၂၁)ကို နိုဝင်ဘာလ(၁၁)ရက်၊ နံနက်(၉)နာရီအချိန်တွင် တိုင်းဒေသကြီးအစိုးရ အဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ တိုင်းဒေသကြီး ကိုဗစ်-၁၉ ရောဂါ ထိန်းချုပ် ရေးနှင့် အရေးပေါ်တုံ့ပြန်ရေးကော်မတီအဖွဲ့ဝင်များ၊ တိုင်းဒေသကြီးအဆင့် ဌာနဆိုင်ရာအကြီး အကဲများ၊ မုံရွာခရိုင်/မြို့နယ် စီမံအုပ်ချုပ်ရေးအဖွဲ့ ဥက္ကဌနှင့် တာဝန်ရှိသူများ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော် က အမှာစကား ပြောကြားရာတွင် ပြောကြားပြီး အစည်းအဝေးသို့ တက်ရောက်လာကြသော တိုင်းဒေသကြီးအစိုးရ အဖွဲ့ဝင် ဝန်ကြီးများ၊ တပ်မတော်အရာရှိကြီးများနှင့် တာဝန်ရှိသူများက နေ့စဉ်ရောဂါပိုး စစ်ဆေးတွေ့ရှိမှု အခြေအနေများ၊ ဆေးရုံတက်ရောက်ကုသမှုနှင့် ဆေးရုံဆင်းမှုအခြေအနေများ၊ အောက်ဆီဂျင်ထုတ် လုပ်သုံးစွဲမှု အခြေအနေများ၊ လုံခြုံရေးဆောင်ရွက်နေမှုအခြေအနေများနှင့် အသက် ၁၂ နှစ်အထက် ကျောင်း သား၊ ကျောင်းသူများ ကာကွယ်ဆေးထိုးနှံရေးအတွက် သက်ဆိုင်ရာကျောင်းများကို အခြေ ပြု၍ ဆေးထိုးနှံရေးလုပ်ငန်း ဆောင်ရွက်နေမှုများ၊ နေ့စဉ်ကာကွယ်ဆေးထိုးနှံမှု အခြေအနေများနှင့် ပတ် သက်၍ အသီးသီး အကြံပြုဆွေးနွေးတင်ပြကြသည်။

ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်က အသီးသီးအကြံပြု ဆွေးနွေး တင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးပြီး နိဂုံးချုပ်စကားပြောကြားကာ အစည်းအဝေးကို ရုပ်သိမ်းခဲ့ကြသည်။

ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်၊ အနောက်မြောက်တိုင်း စစ်ဌာန ချုပ်တိုင်းမှူး ဗိုလ်မှူးချုပ်ဖြိုးသန့်နှင့် တာဝန်ရှိသူများသည် နိုဝင်ဘာလ (၁၂)ရက်၊ မွန်းလွဲပိုင်းတွင် စစ်ကိုင်းတိုင်းဒေသကြီး အစိုးရအဖွဲ့ရုံးဝန်းအတွင်းရှိ ချင်းတွင်းခန်းမတွင် ကျင်းပသော စစ်ကိုင်းတိုင်းဒေသကြီးအတွင်းရှိ ကိုဗစ်-၁၉ တတိယလိူင်းတွင် ကာကွယ်ရေး၊ ထိန်းချုပ်ရေးနှင့် ကုသရေးလုပ်ငန်း များတွင် တက်ကြွစွာပါဝင်ကူညီခဲ့ကြသည့် ပုဂ္ဂိုလ်များ၊ ဌာနဆိုင်ရာများ၊ ကျန်းမာရေးဝန်ထမ်းများ၊ Volunteer အသင်းအဖွဲ့များအား ဂုဏ်ပြုပွဲအခမ်းအနားသို့ တက်ရောက်ကြသည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က အဖွင့်အမှာစကား ပြောကြားရာတွင် “ စစ်ကိုင်းတိုင်းဒေသကြီးအတွင်း ကူးစက်မှုအမြင့်ဆုံးဖြစ်တဲ့ ၂၀၂၁-ခုနှစ် ဇူလိူင်လ၊ သြဂုတ်လ တွေမှာ အမြင့်ဆုံးစစ်ဆေးပိုးတွေ့ရှိမှုအဖြစ် ၅၅.၄၂%နှင့် ဆေးရုံတက်သေဆုံး ရာခိုင်နှုန်း ၁.၃၁% ထိရှိခဲ့ရာ ယနေ့အချိန်တွင် အခမ်းအနားတက်ရောက်လာသူများ၏ စွမ်းစွမ်းတမံတက်ကြွစွာ ပူးပေါင်း ပါဝင်ဆောင်ရွက်ခဲ့မှုကြောင့် စစ်ဆေးပိုးတွေ့ ၁.၈၅%နှင့် ဆေးရုံတက်သေဆုံး ၀.၅၃% ထိရောက်ရှိ အောင် ဆောင်ရွက်နိုင်ခဲ့ပြီဖြစ်ပါကြောင်း၊ ယခုလိုဆောင်ရွက်နိုင်မှုမှာ ကိုဗစ်-၁၉ ရောဂါ ကာကွယ်၊ ထိန်းချုပ်၊ ကုသရေးလုပ်ငန်းစဉ်များ၏ လိုအပ်မှုအ၀၀ကို စေတနာရှင်များ၊ ဌာနဆိုင်ရာများ၊ Volunteer နှင့် ပြည်သူလူထုတို့၏ ဝိုင်းဝန်းကူညီပံ့ပိုးပေးမှုကို ကျေးဇူးတင်ဝမ်းမြောက်မှုအရ ယခု အခမ်းအနားကို ဆောင်ရွက်ခြင်းဖြစ်ပါကြောင်း၊ နောင်ကြုံတွေ့လာရမဲ့ ကိုဗစ်-၁၉ ရောဂါ စတုတ္တလိူင်း ကိုလည်း ယခုလိုစုစုစည်းစည်း ညီညီညွှတ်ညွှတ်ဖြင့် ဝိုင်းဝန်းထိန်းချုပ်ကူညီ ဆောင်ရွက်ပေးကြရန် လိုပါကြောင်း၊ တိုင်းဒေသကြီးအတွင်း ကိုဗစ်-၁၉ ရောဂါဖြစ်ပွားမှုများခဲ့သည့် အချိန်တွင် အားကြိုး မာန်တက် ဝိုင်းဝန်းကူညီ ဆောင်ရွက်ခဲ့ကြသည့် ပုဂ္ဂိုလ်များ၊ ဌာနဆိုင်ရာများ၊ ကျန်းမာရေးဝန်ထမ်းများ၊ စေတနာ့ဝန်ထမ်း Volunteer အသင်းအဖွဲ့များအား မိမိတို့တိုင်းဒေသကြီးအစိုးရအဖွဲ့အနေဖြင့် ဂုဏ်ပြုမှတ်တမ်းတင်ပါကြောင်း “ ပြောကြားခဲ့သည်။

ယင်းနောက် တိုင်းဒေသကြီး ဝန်ကြီးချုပ် ဦးမြတ်ကျော်က ကိုဗစ်-၁၉ တတိယလိူင်း တွင် ကာကွယ်ရေး၊ ထိန်းချုပ်ရေးနှင့် ကုသရေးလုပ်ငန်းများတွင် တက်ကြွစွာပါဝင်ကူညီခဲ့ကြသည့် ကျန်းမာရေးဝန်ထမ်းများကိုယ်စား တိုင်းဒေသကြီး ပြည်သူ့ကျန်းမာ/ကုသရေးဦးစီးမှူး ဒေါက်တာ ဝင်းနိင်၊ တပ်မတော်သား ဆေးဝန်ထမ်းများကိုယ်စား အမှတ်(၄) ကုတင်(၃၀၀) ဆေးတပ်မှူး ဗိုလ်မှူးကြီး မင်းစိုးဦးနှင့် တပ်မတော်သားများကိုယ်စား ဗိုလ်မှူးကြီး ဇော်လင်းထွန်း တို့ထံ ဂုဏ်ပြု မှတ်တမ်းလွှာနှင့် ဂုဏ်ပြုလက်ဆောင်များအား ပေးအပ်ချီးမြင့်သည်။

ဆက်လက်၍ အနောက်မြောက်တိုင်း စစ်ဌာနချုပ်တိုင်းမှူး ဗိုလ်မှူးချုပ် ဖြိုးသန့်က မုံရွာခရိုင် ကိုဗစ်-၁၉ ကော်မတီကိုယ်စား မုံရွာခရ်ိုင် စီမံအုပ်ချုပ်ရေးကော်မတီ ဥက္ကဌ ဦးဇော်တင်မိုး၊ မြို့နယ် ကိုဗစ်-၁၉ ကော်မတီကိုယ်စား မုံရွာမြို့နယ် စီမံအုပ်ချုပ်ရေးကော်မတီ ဥက္ကဌ ဦးလှဝင်းအောင် တို့ထံ ဂုဏ်ပြုမှတ်တမ်းလွှာနှင့် ဂုဏ်ပြုလက်ဆောင်များအား လည်းကောင်း၊ တိုင်းဒေသကြီး လုံခြုံ ရေးနှင့် နယ်စပ်ရေးရာဝန်ကြီး ဗိုလ်မှူးကြီး ဝင်းတင်စိုးက မီးသက်တပ်ဖွဲ့ဝင်များနှင့် ကြက်ခြေနီ သူနာပြုတပ်ဖွဲ့ဝင်များထံ ဂုဏ်ပြုမှတ်တမ်းလွှာနှင့် ဂုဏ်ပြုလက်ဆောင်များအား လည်းကောင်း၊ တိုင်း ဒေသကြီး သယံဇာတရေးရာဝန်ကြီး ဦးတင်သန်းဝင်းက Volunteer အသင်းအဖွဲ့များအား ဂုဏ်ပြု မှတ်တမ်းလွှာနှင့် ဂုဏ်ပြုလက်ဆောင်များအား အသီးသီး ပေးအပ်ချီးမြင့်ခဲ့ကြသည်။

ယင်းနောက် ဂုဏ်ပြုမှတ်တမ်းလွှာ ချီးမြင့်အပ်နှင်းခံသူများကိုယ်စား တိုင်းဒေသကြီး ပြည်သူ့ကျန်းမာ/ကုသရေး ဦးစီးမှူး ဒေါက်တာဝင်းနိုင်က ကျေးဇူးတင်စကား ပြန်လည်ပြောကြားပြီး အခမ်းအနားကို ရုပ်သိမ်းခဲ့ကြသည်။
ထို့နောက် တိုင်းဒေသကြီး ဝန်ကြီးချုပ် ဦးမြတ်ကျော်၊ အနောက်မြောက်တိုင်း စစ်ဌာန ချုပ်တိုင်းမှူး ဗိုလ်မှူးချုပ်ဖြိုးသန့်နှင့် တာဝန်ရှိသူများက ကိုဗစ်-၁၉ တတိယလိူင်းတွင် ကာကွယ်ရေး၊ ထိန်းချုပ်ရေးနှင့် ကုသရေးလုပ်ငန်းများတွင် တက်ကြွစွာပါဝင်ကူညီခဲ့ကြသည့် ပုဂ္ဂိုလ်များ၊ ဌာနဆိုင်ရာ များ၊ ကျန်းမာရေးဝန်ထမ်းများ၊ Volunteer အသင်းအဖွဲ့များအား ဂုဏ်ပြုလက်ဆောင်များ လက် ရောက် ပေးအပ်ချီးမြင့်ခဲ့ကြပြီး စားသောက်ဖွယ်ရာများဖြင့် တည်ခင်းဧည့်ခံခဲ့ကြောင်း သတင်းရရှိ သည်။

မုံရွာ နိုဝင်ဘာ ၉

စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်သည် တိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး ဝင်းတင်စိုး၊ စီးပွားရေးရာဝန်ကြီး ဒေါ်ရီရီသန်း၊ တိုင်းရင်းသားရေးရာဝန်ကြီး ဦးစိုင်းနိုင်နိုင်ကျော်နှင့် တာဝန်ရှိသူများလိုက်ပါလျှက် နိုဝင်ဘာလ (၈)ရက်၊ မွန်းလွဲပိုင်းတွင် မုံရွာပညာရေးကောလိပ်၊ ပညာရတနာခန်းမတွင် ကျင်းပသော မုံရွာပညာရေးဒီဂရီကောလိပ်သို့ အသစ်ခန့်ထားသော  နည်းပြ၊ သရုပ်ပြများနှင့် အခြေခံပညာဦးစီးဌာနသို့ အသစ်ခန့်ထားသော အလယ်တန်းပြ၊ မူလတန်းပြ ဆရာ/ဆရာမ သစ်လွင်များအား ကြိုနှုတ်ဆက်ခြင်းနှင့် မွမ်းမံသင်တန်းဖွင့်ပွဲ အခမ်းအနားသို့ တက်ရောက်ကြသည်။

                ရှေးဦးစွာ တိုင်းဒေသကြီးဝန်ကြီးချုပ် ဦးမြတ်ကျော်က အမှာစကား ပြောကြားရာတွင် “ နိုင်ငံတော် ဖွံ့ဖြိုးတိုးတက်ရေးမှာ အရေးပါတဲ့ ထောက်တိုင်တစ်ခုဖြစ်တဲ့ ပညာရေးကဏ္ဍမှာ တာဝန်ထမ်းဆောင်ကြမည့် ဆရာ၊ဆရာများကို တွေ့ဆုံရတာ အလွန်မင်္ဂလာရှိပါကြောင်း၊ တိုင်းဒေသကြီးအတွင်းမှာရှိတဲ့ အခြေခံပညာကျောင်းများမှာ ဆရာ၊ကျောင်းသားအချိုး ကောင်းမွန်တိုးတက်ရေးနဲ့ ဆရာ၊ဆရာမများရဲ့ သင်ကြားမှုအရည်အသွေး ပြည့်၀စေရေးကို နိုင်ငံတော်အနေနဲ့ ဦးစားပေးဆောင်ရွက်လျက် ရှိနေတာနဲ့အညီ ဆရာ၊ ဆရာမအင်အား ဖြည့်တင်းခန့်အပ်ခြင်းနဲ့ အရည်အသွေးမြှင့်သင်တန်းများ ပို့ချခြင်းတို့ကို ဆောင်ရွက်နေတာဖြစ်ပါကြောင်း၊ ဆရာ၊ဆရာမ သစ်လွင်များအနေဖြင့် ဆရာအတတ်ပညာဆိုင်ရာ အသိပညာ၊ အတတ်ပညာများရရှိဖို့နဲ့ ဝန်ထမ်းစည်းမျဉ်းစည်းကမ်းများကိုလည်း သိရှိနားလည်ဖို့ နိုင်ငံတော်မှာ အကောင်အထည်ဖော်ဆောင်ရွက်နေတဲ့ သင်ရိုးသစ်များကို ထိရောက်စွာ အကောင်အထည်ဖော် သင်ကြားလေ့ကျင့်ပေးလျက်ရှိပါကြောင်း၊ ဆရာ၊ဆရာများအနေဖြင့် မိမိတို့ရဲ့ အရည်အသွေးမြင့်မား တိုးတက်ရေးအတွက် အပြည့်အဝလ့လာမှတ်သား သွားကြဖို့လည်းတိုက်တွန်းလိုပါကြောင်း ” ပြောကြားခဲ့သည်။

                ယင်းနောက် မုံရွာပညာရေးဒီဂရီကောလိပ် ကျောင်းအုပ်ဆရာမကြီး ဒေါ်ဝင်းသိင်္ဂီကျော်က မုံရွာ ပညာရေးဒီဂရီကောလိပ်သို့ အသစ်ခန့်ထားသော  နည်းပြ၊ သရုပ်ပြများနှင့် အခြေခံပညာဦးစီးဌာနသို့ အသစ်ခန့်ထားသော အလယ်တန်းပြ၊ မူလတန်းပြ ဆရာ/ဆရာမ သစ်လွင်များအားကြိုနှုတ်ဆက်ခြင်းနှင့် မွမ်းမံသင်တန်းဖွင့်လှစ်သင်ကြားမည့် ဘာသာရပ်ဆိုင်ရာများနှင့် ပတ်သက်၍ ရှင်းလင်းပြောကြားသည်။

                ဆက်လက်၍ တိုင်းဒေသကြီး ဝန်ကြီးချုပ် ဦးမြတ်ကျော်က မုံရွာပညာရေးဒီဂရီကောလိပ်ရှိ နည်းပြ၊ သရုပ်ပြ၊ ဆရာ/ ဆရာမများအတွက် ငွေကျပ် - ၇,၁၇၀,၀၀၀ (ခုနှစ်ဆယ့်တစ်သိန်းခုနှစ်သောင်း) ကျပ်အား ပေးအပ်ချီးမြှင့်ပြီး အခမ်းအနားကိုရုပ်သိမ်းကာ နည်းပြ၊ သရုပ်ပြ၊ ဆရာ/ဆရာမများအား ရင်းရင်းနှီးနှီး လိုက်လံနှုတ်ဆက် အားပေးခဲ့ကြသည်။

စစ်ကိုင်းတိုင်းဒေသကြီးအတွင်း ခရိုင်/မြို့နယ်များရှိ အခြေခံပညာဦးစီးဌာနများသို့ အသစ်ခန့်အပ်လိုက်သည့် အထက်တန်းပြ ဆရာ၊ဆရာမ - ၃၀၃ ဦး၊ အလယ်တန်းပြ ဆရာ၊ဆရာမ - ၉၇ ဦး၊ မူလတန်းပြ ဆရာ၊ဆရာ - ၄၉၉ ဦး၊ စုစုပေါင်း - ၈၉၉ ဦး ခန့်အပ်ခဲ့ပြီး မုံရွာပညာရေးဒီဂရီကောလိပ်တွင် တာဝန်ထမ်းဆောင်ကြမည့် နည်းပြ၊ သရုပ်ပြ ဆရာ/ဆရာမ - ၁၇ ဦးနှင့် အလယ်တန်းပြ ဆရာ၊ဆရာမ - ၃၉ ဦး၊ မူလတန်းပြဆရာ၊ဆရာမ - ၁၈၃ ဦး စုစုပေါင်း ၂၃၉ ဦးအား မွမ်းမံသင်တန်းကို နိုဝင်ဘာလ(၈)ရက်နေ့မှ ဒီဇင်ဘာလ(၈)ရက်နေ့အထိ ဝန်ထမ်းစည်းမျဉ်းစည်းကမ်းဘာသာရပ်၊ စီမံဘဏ္ဍာဘာသာရပ်၊ အလယ်တန်းသင်ရိုးသစ် ဘာသာရပ်၊ မူလတန်းသင်ရိုးသစ် ဘာသာရပ်များနှင့် သင်ကြားရေးဘာသာရပ်များ သင်ကြားပို့ချပေးသွားမည်ဖြစ်ကြောင်း သတင်းရရှိသည်။