မုံရွာ ၊ အောက်တိုဘာ ၆

စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်သည် တိုင်းဒေသကြီး အစိုးရအဖွဲ့ဝင် များ၊ တိုင်းဒေသကြီးအဆင့် ဌာနဆိုင်ရာများနှင့် တာဝန်ရှိသူများ လိုက်ပါလျက် ယမန်နေ့၊ မွန်းလွဲပိုင်းတွင် ကန့်ဘလူမြို့၊ အမှတ်(၁)အခြေခံပညာအထက်တန်းကျောင်းသို့ ရောက်ရှိရာ ဆရာ၊ဆရာမများအား ရင်းရင်းနှီးနှီးနှုတ်ဆက်အားပေးပြီး ဆရာ၊ဆရာမများအတွက် ထောက်ပံ့ငွေများပေးအပ်ကာ အလျား – ၁၄၀ ပေ၊ အနံ – ၃၀ ပေ၊ RCC ၃ ထပ်ကျောင်းဆောင် အဆောက်အဦသစ်တည်ဆောက်နေမှုအား ကြည့်ရှုစစ်ဆေးပြီး တည်ဆောက်ရေးလုပ်ငန်းများနှင့်ပတ်သက်၍ လိုအပ်သည်များကို တာဝန်ရှိသူများ ဖြည့်ဆည်းပေါင်းစပ်ဆောင်ရွက်ပေးခဲ့သည်။

ယင်းနောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ကန့်ဘလူမြို့ရှိ မဟာရွှေစည်ကြီးကျောင်းတိုက်သို့ ရောက်ရှိရာ ဆရာတော်ကြီးနှင့် ပင့်သံဃာ ဆရာတော်ကြီးများထံ တာဝန်ရှိသူများနှင့်အတူ လှူဖွယ်ပစ္စည်းများ ဆက်ကပ်လှူဒါန်းခဲ့ကြပြီး သာသနာရေးဆိုင်ရာများ လျှောက်ထားခဲ့ကြသည်။

ဆက်လက်ပြီး တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် ကန့်ဘလူမြို့၊ ကုတင် ၁၀၀ ဆံ့ ပြည်သူ့ဆေးရုံသို့ ရောက်ရှိရာ ဆေးကုသမှုခံယူနေကြသည့် ဒေသခံပြည် သူများအားရင်းရင်း နှီးနှီးလိုက်လံနှုတ်ဆက်အားပေးကာ တာဝန်ရှိသူများနှင့်အတူ့ ဆေးကုသမှုခံ ယူနေသောလူနာများအား အဟာရဖြည့်စွက်စာများ အသီးသီး ထောက်ပံ့ပေးအပ်ခဲ့ပြီး ဆေးရုံဝန်ထမ်းများအတွက် ထောက်ပံ့ငွေများပေးအပ်ခဲ့ကြောင်းသိရသည်။

မုံရွာ ၊ အောက်တိုဘာ ၅

စစ်ကိုင်းတိုင်းဒေသကြီး၊ ၂၀၂၃-ခုနှစ်၊ ကမ္ဘာ့ဆရာများနေ့ (World Teacher’s Day ) အထိမ်းအမှတ် အခမ်းအနားကို အောက်တိုဘာလ ၅ ရက်နေ့ နံနက်ပိုင်းတွင် တိုင်းဒေသကြီး အစိုးရအဖွဲ့ရုံးဝန်းအတွင်းရှိ ချင်းတွင်းခန်းမတွင် ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ ပညာရေးဝန်ထမ်းများ၊ ဆရာ/ဆရာမများ၊ ကျောင်းသား၊ကျောင်းသူများနှင့် ဖိတ်ကြားထားသူများ တက်ရောက်ကြသည်။

ရှေးဦးစွာ အမှတ်(၂)အခြေခံပညာအထက်တန်းကျောင်းမှ ကျောင်းသား၊ကျောင်းသူများ က “ မြတ်ဆရာ ”တေးသီချင်းသီဆို၍ အခမ်းအနားအား ဖွင့်လှစ်ကြသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ၊ နိုင်ငံတော် ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ထံမှ ကမ္ဘာ့ဆရာများနေ့ အထိမ်းအမှတ်အခမ်းအနားသို့ ပေးပို့သည့်သဝဏ်လွှာအား တိုင်းဒေသကြီး ဝန်ကြီးချုပ် ဦးမြတ်ကျော်က ဖတ်ကြားသည်။

ဆက်လက်ပြီး ကုလသမဂ္ဂလက်အောက်ခံ အဖွဲ့ ၅ ဖွဲ့၏ အဖွဲ့ခေါင်းဆောင်များမှ ပေးပို့သည့် စုပေါင်းသဝဏ်လွှာအား တိုင်းဒေသကြီးပညာရေးမှူးဒုတိယညွှန်ကြားရေးမှူးချုပ် ဦးတင်လှိုင်က ဖတ်ကြားသည်။

ဆက်လက်၍ အသက်(၇၀)နှစ်နှင့်အထက် ဆရာကြီး၊ဆရာမကြီးများအား တိုင်းဒေသကြီး ဝန်ကြီးချုပ် က ကန်တော့ငွေနှင့်ပစ္စည်းများအား ပေးအပ်ခဲ့ပြီး ၂၀၂၃-ခုနှစ်၊ ကမ္ဘာ့ဆရာများ နေ့ (World Teachr’s Day )အထိမ်းအမှတ် တိုင်းဒေသကြီးအဆင့် စာစီစာကုံးပြိုင်ပွဲတွင် ပထမ၊ ဒုတိယ၊တတိယဆုရရှိကြသော ကျောင်းသား၊ ကျောင်းသူများအား လည်းကောင်း၊ တိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး ဝင်းတင်စိုးနှင့် တိုင်းဒေသကြီး ပညာရေးမှူး ဒုတိယညွှန်ကြားရေးမှူးချုပ် ဦးတင်လှိုင်က တိုင်းဒေသကြီးအဆင့် ကဗျာပြိုင်ပွဲတွင် ပထမ၊ ဒုတိယ၊ တတိယဆုရရှိသော ကျောင်းသား၊ကျောင်းသူများအားဆုများ အသီးသီးပေးအပ်ချီးမြှင့်ခဲ့ကြသည်။

ယင်းနောက် မုံရွာမြို့၊ အမှတ်(၃) အခြေခံပညာအထက်တန်းကျောင်းမှ ကျောင်းသား၊ ကျောင်းသူများမှ “ ပန်းကလေးများ၏ဥယျာဉ်မှူး ”တေးသီချင်းဖြင့် သီဆိုဖျော်ဖြေကြပြီး မုံရွာမြို့၊ အမှတ်(၁) အခြေခံပညာအထက်တန်းကျောင်း(အလုံ)မှ Grade – 10 မှ မသိမ့်သဉ္ဇာအောင်က “မွန်မြတ်လှပ ဆရာ့ဘဝ”ခေါင်းစဉ်ဖြင့် ဂါဝရပြုပြောကြားပြီး အမှတ်(၂) အခြေခံပညာအထက်တန်းကျောင်း(အလုံ)မှ ကျောင်းသား၊ကျောင်းသူများက “ထာဝရ မြန်မာ”တေးသီချင်းဖြင့် သီဆိုဖျော်ဖြေကြကာ သီဆိုဖျော်ဖြေပေးသော ကျောင်းသား/ကျောင်းသူလေးများအား       တိုင်းဒေသကြီး တရားသူကြီးချုပ် ဦးဇော်ထူးက ဂုဏ်ပြု ချီးမြင့်ငွေများ ပေးအပ်ချီးမြှင့်ခဲ့သည်။

ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများက ဆုရကျောင်းသား၊ ကျောင်းသူများနှင့်အတူ စုပေါင်းမှတ်တမ်း ဓါတ်ပုံရိုက်ကူးကာ အခမ်းအနားသို့ တက်ရောက် လာသူများအား ရင်းရင်းနှီးနှီးလိုက်လံ နှုတ်ဆက်အားပေးပြီး အခမ်းအနားကို ရုပ်သိမ်းခဲ့ကြောင်းသိရသည်။