မုံရွာ အောက်တိုဘာ ၂၇
စစ်ကိုင်းတိုင်းဒေသကြီး ဝန်ကြီးချုပ်နှင့် တာဝန်ရှိသူများသည် အောက်တိုဘာလ ၂၇ ရက်မွန်းလွဲပိုင်းတွင် ဧရာဝတီမြစ်အတွင်း တိုင်းဒေသကြီး ရေအရင်းအမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ တာဝန်ယူဆောင်ရွက်နေသော စစ်ကိုင်းမြို့၊ သီတဂူအမှတ် ၂ မြစ် ရေတင်စက် ရေရရှိရေးအတွက် အလျား – ၁၄၅၀ မီတာ၊ အနံ ၃၅ မီတာ၊ ရေစစ်မျဉ်း အောက်အနက် ၂.၅ မီတာ သောင်တူးဖော်ခြင်းလုပ်ငန်း ဆောင်ရွက်မည့် မြစ်ကြောင်းတစ်လျှောက်သို့ ရေယာဉ်ဖြင့်ရောက်ရှိ ကြသည်။ ရှေးဦးစွာ ရေအရင်းအမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ တိုင်းဒေသကြီးဦးစီးမှူးမှ ဧရာဝတီမြစ်အတွင်း သောင်တူးဖော်ခြင်းလုပ်ငန်းများ ဆောင်ရွက်သွားမည့် လုပ်ငန်းအခြေအနေများအား ရှင်းလင်းတင်ပြသည်။ ယင်းနောက် တိုင်းဒေသကြီး ဝန်ကြီးချုပ်က ရှင်းလင်းတင်ပြချက်များအပေါ် လိုအပ်သည် များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ပြီး ဧရာဝတီမြစ်ကြောင်း တစ်လျှောက် သောင်တူးလုပ်ငန်းများ ဆောင်ရွက်သွားမည့် နေရာများအား လိုက်လံကြည့်ရှုစစ် ဆေးခဲ့ကြောင်း သိရသည်။ .
