မုံရွာ၊ ဒီဇင်ဘာ ၂၆
စစ်ကိုင်းတိုင်းဒေသကြီး မုံရွာ-သူနာပြုသားဖွားသင်တန်းကျောင်း (အဌမ)အကြိမ် မြောက် သူနာပြု -သားဖွားဒီပလိုမာ အောင်လက်မှတ်အပ်နှင်းပွဲ အခမ်းအနားကို ဒီဇင်ဘာ လ ၂၆ ရက်၊ နံနက်ပိုင်းတွင် အဆိုပါကျောင်းရှိ ၅ ထပ်ဆောင်ခန်းမတွင် ကျင်းပပြုလုပ်ရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရ အဖွဲ့ဝင် များ၊ တိုင်းဒေသကြီးအဆင့် ဌာနဆိုင်ရာများ၊ ပြည်သူ့ကျန်းမာရေးနှင့်ကုသရေးဦးစီးဌာနမှ တိုင်းဒေသကြီးဦးစီးမှူးနှင့် ဝန်ထမ်းများ၊ မုံရွာဆေးရုံအုပ်ကြီး၊ သူနာပြုသားဖွားသင်တန်းကျောင်း မှ ကျောင်းအုပ်ကြီးနှင့်ဆရာ/ဆရာမများ၊ သင်တန်း သား/သူများ တက်ရောက်ကြ သည်။
ဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က သူနာပြုသားဖွားသင်တန်း ကျောင်းမုံရွာသည် မိမိတို့တိုင်းဒေသကြီးအတွက် အရည်အသွေးပြည့်မီသည့် သူနာပြု ဆရာ/ဆရာမများအား မွေးထုတ် ပေးနေပြီး လူ့စွမ်းအားအရင်းအမြစ်ဖြစ်သည့် သင်တန်း ကျောင်းကြီးတစ်ခု ဖြစ်ပါကြောင်း၊ သင်တန်းသား/သူများအနေဖြင့် ပြည်သူလူထု၏ ကျန်း မာရေးစောင့်ရှောက်မှုပေးရာတွင် သူနာပြုဆရာ/ဆရာမများ၏ အရည်အသွေးမြင့်မား ရေး၊ကျင့်ဝတ်နှင့်အညီပြုစုစောင့်ရှောက်မှု ပေးနိုင်ရေးကိုလည်း အလေးထားဆောင်ရွက် သွားကြရန် လိုအပ်ပါကြောင်း၊ အောင်လက်မှတ်များ အပ်နှင်းခံရပြီးနောက် လုပ်ငန်းခွင် သို့ဝင်ရောက်သည့်အခါ သူနာပြုဆရာ/ဆရာမများအားလုံး အပြန်အလှန်လေးစားမှုဖြင့် အသင်းအဖွဲ့စိတ်ဓါတ်ဖြင့် ညီညီ ညွတ်ညွတ် ပူးပေါင်းဆောင်ရွက်သွားကြရန် လိုအပ်ပါ ကြောင်း ပြောကြားခဲ့သည်။
ယင်းနောက် တိုင်းဒေသကြီး စီးပွားရေးရာဝန်ကြီး ဒေါ်ရီရီသန်းက မုံရွာ-သူနာပြု သားဖွားသင်တန်းကျောင်း ကျောင်းအုပ်ကြီးထံ ချီးမြှင့်ငွေကျပ် – ၁၀ သိန်းအား ပေးအပ်ချီးမြှင့်ပြီး တိုင်းဒေသကြီး ပြည်သူ့ကျန်းမာရေးနှင့်ကုသရေးဦးစီးဌာနမှ တိုင်းဒေသကြီး ဦးစီးမှူးက သင်တန်းဆင်းအမှာစကား ပြောကြားသည်။
ထို့နောက် မုံရွာ-သူနာပြု သားဖွားသင်တန်းကျောင်းမှ ကျောင်းအုပ်ကြီးက သင်ကြားရေးတာဝန်ခံ ဆရာမကြီးထံ သင်တန်းဆင်းလက်မှတ်များအား ပေးအပ်ကာ တိုင်းဒေသကြီး ဝန်ကြီးချုပ်နှင့် တာဝန် ရှိသူများမှ သင်တန်သား/သူများနှင့် စုပေါင်းမှတ်တမ်းတင် ဓါတ်ပုံရိုက်ကူးခဲ့ကြောင်း သိရသည်။
