မုံရွာ၊ အောက်တိုဘာ ၂
၂၀၂၄ခုနှစ်၊အပြည်ပြည်ဆိုင်ရာသက်ကြီးပုဂ္ဂိုလ်များနေ့ အခမ်းအနားကို ယနေ့ နံနက်ပိုင်းက စစ်ကိုင်းတိုင်းဒေသကြီးအစိုးရအဖွဲ့ရုံး၊ ချင်းတွင်းခန်းမတွင် ကျင်းပပြုလုပ်ရာ စစ်ကိုင်းတိုင်းဒေသကြီး တရားလွှတ်တော် တရားသူကြီးချုပ် ဦးဇော်ထူး နှင့်အတူ စစ်ကိုင်းတိုင်းဒေသကြီး အစိုးရအဖွဲ့၊ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဝင်းတင်စိုး၊ တိုင်းဒေသကြီး ဥပဒေချုပ် ဒေါ်လှလှဝင်း၊ တိုင်းဒေသကြီး ၊ခရိုင်၊မြို့နယ်အဆင့် ဌာနဆိုင်ရာ တာဝန်ရှိသူများ၊ ဂုဏ်ပြုခံဘိုးဘွားများနှင့် လူမှုရေးအသင်းအဖွဲ့များ တက်ရောက်ခဲ့ကြသည်။
ဦးစွာ စစ်ကိုင်းတိုင်းဒေသကြီး အစိုးရအဖွဲ့၊ လုံခြုံရေးနှင့် နယ်စပ်ရေးရာဝန်ကြီး က ယခု ၂၀၂၄ ခုနှစ်၊ အပြည်ပြည်ဆိုင်ရာ သက်ကြီးပုဂ္ဂိုလ်များနေ့ အတွက် ကုလသမဂ္ဂက ချမှတ်ပေးထားတဲ့ ဆောင်ပုဒ်ကတော့ “သက်ကြီး ပုဂ္ဂိုလ်များ ဂုဏ်သိက္ခာရှိစွာ ရပ်တည်ရေး ကမ္ဘာအနှံ့ ဘက်စုံပြုစု စောင့် ရှောက်ပေး” ဖြစ်ပါကြောင်း။သက်ကြီးပုဂ္ဂိုလ်များ၏ အဖိုး မဖြတ်နိုင်တဲ့ အတွေ့အကြုံ၊ ဗဟုသုတများကို အခြေပြု၍ ၄င်းတို့၏ စွမ်းဆောင်ရည်များကို မြှင့်တင်ပေးပြီး လူမှုပတ်ဝန်းကျင်တွင် လိုအပ် လျက်ရှိသော ဖွံ့ဖြိုးတိုးတက်မှု လုပ်ငန်းစဉ်များတွင် ပါဝင်စေခြင်းဖြင့် သာယာ လှပ ငြိမ်းချမ်းပြည့်စုံသော အနာဂတ်အသစ်တစ်ခု ဖန်တီးပေးဖို့ ဖြစ်ပါကြောင်း။ မြန်မာတို့ရဲ့ မြတ်နိုးဖွယ်ရာ ဓလေ့ဖြစ်တဲ့ သက်ကြီးပုဂ္ဂိုလ် မိဘများအပေါ် လေးစား ချစ်ခင်မှုများနှင့်အတူ ယုယပြုစုစောင့်ရှောက်ပေးခြင်း၊ တိုင်းဒေသကြီးအတွင်း ဌာန အခြေပြု စောင့်ရှောက်နည်းဖြစ်တဲ့ ဘိုးဘွားရိပ်သာများမှ ဘိုးဘွားများ ကိုလည်း ပြုစုမှု နည်းစနစ်မှန်ကန်စွာဖြင့် ရေရှည်တည်တံ့အောင် ဆောင်ရွက်ပေးခြင်း၊ ဒါ့အပြင် ရပ်ရွာအခြေပြု စောင့်ရှောက်နည်းများ တိုးပွားများပြားလာအောင် ပူးပေါင်းဆောင်ရွက်ပေးခြင်းနှင့် အားမာန်အဖွဲ့တွေကိုလည်း ကျယ်ကျယ်ပြန့်ပြန့် ဖွဲ့စည်းပြီး လုပ်ငန်းရပ် များ သွက်လက်မြန်ဆန်လာအောင် ဆောင်ရွက်နိုင်ဖို့ ပံ့ပိုးကူညီပေးကြ ပါလို့ တိုက်တွန်း ပြောကြားခဲ့သည်။
ဆက်လက်ပြီး စစ်ကိုင်းတိုင်းဒေသကြီး တရားလွှတ်တော် တရားသူကြီးချုပ်က စစ်ကိုင်းတိုင်းဒေသကြီးအတွင်း လူမှုဝန်ထမ်းဦးစီးဌာန၏ တည်ထောင်ခွင့်ပြုမိန့်ရ ဘိုးဘွားရိပ်သာ(၉)ခုသို့ လူမှုဝန်ထမ်းဦးစီးဌာနမှ ဆန်ဖိုးထောက်ပံ့ ငွေကျပ် ၃၃၄ သိန်း ၂ သောင်း ၃ ထောင် အား လည်းကောင်း၊ စစ်ကိုင်းတိုင်းဒေသကြီး အစိုးရအဖွဲ့ ဥပဒေချုပ် ကအသက်အကြီးဆုံး ဘိုးဘွား (၂)ဦးအား တစ်ဦးလျှင် အလှူငွေကျပ်(၃၀၀၀၀ဝိ/-)နှုန်းဖြင့် လည်းကောင်းအသီးသီးပေးအပ်ခဲ့ပြီးနောက်အခမ်းအနားသို့ တက်ရောက်လာသော တိုင်းဒေသကြီး အဆင့်တာဝန်ရှိသူများက ဘိုးဘွားများအား ဂါရဝလက်ဆောင်များ ပေးအပ်လှူဒါန်းခဲ့သည်။
ထို့နောက် တိုင်းဒေသကြီး တရားလွှတ်တော် တရားသူကြီးချုပ်နှင့်အဖွဲ့က အပြည်ပြည်ဆိုင်ရာသက်ကြီးပုဂ္ဂိုလ်များနေ့အခမ်းအနားအား ဂုဏ်ပြုသောအားဖြင့် သူနာပြုနှင့်သားဖွားသင်တန်းကျောင်း(မုံရွာ)မှ စကားဝါမြေ သီချင်းနှင့် ခြိမ့်ခြိမ့်သဲ သီချင်းတို့ဖြင့် တေးသရုပ်ဖော် အကအလှကပြဖျော်ဖြေမှုတို့အားလည်းကောင်း၊အပြည်ပြည်ဆိုင်ရာသက်ကြီးပုဂ္ဂိုလ်များနေ့အခမ်းအနားအတွက် လူမှုဝန်ထမ်းဦးစီးဌာန မှ ပေးပို့သည့် Video Clipပြသမှုတို့အားလည်း ကောင်း ကြည့်ရှုအားပေးခဲ့သည်။
ယင်းနောက် ဘိုးဘွားများ၏ ကိုယ်စား အဘိုးတစ်ဦးက ကျေးဇူးတင်စကား ပြန်လည်ပြောကြားခဲ့ပြီးနောက် တိုင်းဒေသကြီး တရားလွှတ်တော် တရားသူကြီးချုပ်နှင့်အဖွဲ့က ဂုဏ်ပြုခံဘိုးဘွားများအား ရင်းရင်းနှီးနှီး နှုတ်ဆက်ခဲ့ကြောင်းသိရသည်။
အဆိုပါ ၂၀၂၄ခုနှစ်၊အပြည်ပြည်ဆိုင်ရာသက်ကြီးပုဂ္ဂိုလ်များနေ့အခမ်းအနားတွင် စစ်ကိုင်းတိုင်းဒေသကြီး အစိုးရအဖွဲ့ မှ မုံရွာမြို့ပေါ်ရှိ ဂုဏ်ပြုခံဘိုးဘွား ၁၇၅ ဦးအတွက် ငွေကျပ် ၈၇ သိန်း ၅ သောင်းကို ထောက်ပံ့ပေးအပ်ခဲ့ကြောင်းသိရသည်။
