မုံရွာ၊ အောက်တိုဘာ ၂၈

စစ်ကိုင်းတိုင်းဒေသကြီး ဝန်ကြီးချုပ် ဦးကိုလေး၊ တိုင်းဒေသကြီး အစိုးရအဖွဲ့ဝင် များ၊ စစ်ကိုင်းခရိုင်/မြို့နယ် စီမံခန့်ခွဲရေးနှင့်အုပ်ချုပ်ရေးကော်မတီ ဥက္ကဌများနှင့် တာဝန်ရှိ သူများသည် အောက်တိုဘာလ ၂၈ ရက်၊ နံနက်ပိုင်းတွင် အစိုးရနည်းပညာတက္ကသိုလ် (စစ်ကိုင်း)သို့ ရောက်ရှိရာ အစည်းအဝေးခန်းမ၌ ဒုတိယပါမောက္ခချုပ်၊ ပါမောက္ခ/ဌာနမှူး များ၊ ဝန်ထမ်းများနှင့် တွေ့ဆုံရာ ဒုတိယပါမောက္ခချုပ်ကကျောင်း၏ စီမံ/အုပ်ချုပ်ရေးဆိုင် ရာလုပ်ငန်းများ၊ ပညာသင်နှစ်အလိုက် သင်ကြားရေးဆိုင်ရာလုပ်ငန်းများ ဆောင်ရွက်နေမှု များနှင့် စာသင်ဆောင်၊ ကျောင်းသား၊ကျောင်းသူ အိပ်ဆောင်များ၊ ဝန်ထမ်းနေအိမ်များ ပြင် ဆင်တည်ဆောက်ရေးလုပ်ငန်းများ ဆောင်ရွက်နေမှု အခြေအနေများအား ရှင်းလင်းတင်ပြ သည်။
ယင်းနောက် တိုင်းဒေသကြီး ဝန်ကြီးချုပ်က ပညာသင်နှစ်အလိုက် ကျောင်းသားဦး ရေအပ်နှံမှုအတိုင်းသင်ကြားသွားရေး၊ စာသင်ဆောင်များ၊ လက်တွေ့အလုပ်ရုံ ပတ်ဝန်းကျင် သန့်ရှင်းသပ်ရပ်မှုရှိစေရေး၊ သင်ထောက်ကူပြု ပစ္စည်းများအား အမှန်တကယ်လက်တွေ့ အသုံးချကာ ကျောင်းသား၊ကျောင်းသူများအတွက် အကျိုးရှိစွာသင်ကြားသွားရေး၊ ကျောင်း ဆောင်အဆောက်အဦများနှင့် ဝန်ထမ်းနေအိမ်များ ပြင်ဆင်တည်ဆောက်နေမှု လုပ်ငန်းများ အချိန်မီပြီးစီးအောင် တည်ဆောက်သွားရေးတို့ကို တာဝန်ရှိသူများအား မှာကြားကာ စီမံ၊ အုပ်ချုပ်၊ သင်ကြားရေးလုပ်ငန်းများနှင့် ပတ်သက်၍ ရှင်းလင်းတင်ပြချက်များအပေါ် လိုအပ် သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့သည်။

ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် အစိုးရနည်း ပညာတက္ကသိုလ်(စစ်ကိုင်း)ရှိ စာသင်ဆောင်များ၊ လက်တွေ့အလုပ်ရုံ အဆောက်အဦများ အတွင်း လိုက်လံကြည့်ရှုခဲ့ပြီး တက္ကသိုလ်စာကြည့်တိုက်ရှိ ပရိဘောဂပစ္စည်များနှင့် စာအုပ် စာစောင်များ စနစ်တကျခင်းကျင်းထားရှိများနှင့် ကွန်ပျူတာအသုံးပြု လက်တွေ့အခန်းတို့ အား လိုက်လံကြည့်ရှုခဲ့ကြပြီး လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ ကြောင်း သိရသည်။

မုံရွာ၊ အောက်တိုဘာ ၂၅

၂၀၂၆-ခုနှစ်၊ စစ်ကိုင်းတိုင်းဒေသကြီးအစိုးရအဖွဲ့ ဝန်ကြီးချုပ်ဖလား ခရိုင်ပေါင်းစုံ အသက်(၂၅)နှစ်အောက် အမျိုးသား ဖူဆယ်ပြိုင်ပွဲ ဗိုလ်လုပွဲနှင့် ဆုချီးမြှင့်ပွဲ အခမ်းအနားကို အောက်တိုဘာလ ၂၅ ရက်၊ နံနက်ပိုင်းတွင် မုံရွာမြို့၊ ပြည်သူ့အားကစားကွင်းအတွင်းရှိ ဖူဆယ်အားကစားရုံတွင် ကျင်းပပြုလုပ်ရာ ဗိုလ်လုပွဲနှင့်ဆုချီးမြှင့်ပွဲ အခမ်းအနားသို့ တိုင်းဒေသကြီး ဝန်ကြီးချုပ် ဦးကိုလေး၊ တိုင်းဒေသကြီး လွှတ်တော် ဥက္ကဌ၊ တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး/ခရိုင်/မြို့နယ် အဆင့် ဌာနုဆိုင်ရာများ၊ ပြိုင်ပွဲဝင်အသင်း အုပ်ချုပ်သူများနှင့် အားကစားသမားများ တက် ရောက်ကြသည်။

ဦးစွာ တိုင်းဒေသကြီး ဝန်ကြီးချုပ်၊ တိုင်းဒေသကြီး လွှတ်တော် ဥက္ကဌ၊ တိုင်းဒေသ ကြီးအစိုးရအဖွဲ့ဝင်များနှင့် တာဝန်ရှိသူများက ၂၀၂၆-ခုနှစ်၊ တိုင်းဒေသကြီး အစိုးရအဖွဲ့ ဝန်ကြီးချုပ်ဖလား ခရိုင်ပေါင်းစုံ အသက်(၂၅)နှစ်အောက် အမျိုးသား ဖူဆယ်ပြိုင်ပွဲ ဗိုလ်လုပွဲစဉ်အဖြစ် မုံရွာခရိုင်အသင်းနှင့် ကောလင်းခရိုင်အသင်းတို့ ယှဉ်ပြိုင်ကစားနေမှု များအား ကြည့်ရှုအားပေးရာ မုံရွာခရိုင်အသင်းမှ ကောလင်းခရိုင်အသင်းအား ၄ ဂိုး၊ ၃ ဂိုး ဖြင့် အနိုင်ရရှိသွားသည်။

ယင်းနောက် ဆုချီးမြှင့်ပွဲအခမ်းအနားကို ကျင်းပရာ တိုင်းဒေသကြီး စီမံကိန်း၊စီးပွားရေးနှင့်ဘဏ္ဍာရေး ဝန်ကြီးမှ ပွဲစဉ်တစ်လျှောက် နေရာအလိုက်အကောင်းဆုံးဆုရ အားကစားသမားများအား ဆုတံဆိပ်နှင့် ငွေသားဆုများအား ပေးအပ်ချီးမြှင့်သည်။

ဆက်လက်၍ တိုင်းဒေသကြီး လုံခြုံရေးနှင့်နယ်စပ်ရေးရာ ဝန်ကြီးနှင့် တိုင်းဒေသ ကြီး တရားသူကြီးချုပ်တို့မှ ပူးတွဲတတိယဆုရရှိသည့် ကလေးခရိုင်အသင်းနှင့် ကသာ ခရိုင်အသင်းအား တစ်ဦးချင်းဆုတံဆိပ်နှင့် ဂုဏ်ပြုဆုငွေကျပ်- ၃ သိန်းကျပ်စီအား လည်းကောင်း၊ တိုင်းဒေသကြီး လွှတ်တော် ဥက္ကဌမှ ဒုတိယဆုရရရှိသည့် ကောလင်းခရိုင် အသင်းအား တစ်ဦးချင်းဆုတံဆိပ်နှင့် ဂုဏ်ပြုဆုငွေကျပ် – ၅ သိန်းအား လည်းကောင်း ပေးအပ်ချီးမြှင့်ကြသည်။

ထို့နောက် တိုင်းဒေသကြီး ဝန်ကြီးချုပ်မှ ပထမဆုရရှိသည့် မုံရွာခရိုင်အသင်းအား တစ်ဦးချင်းဆုတံဆိပ်၊ ဂုဏ်ပြုဆုငွေကျပ်- ၇ သိန်းနှင့် တံခွန်စိုက်ဆုဖလားအား ပေးအပ်ချီးမြှင့်ကာ ဆုရအားကစားသမားများအား ရင်းရင်းနှီးနှီး လိုက်လံနှုတ်ခဲ့ကြသည်။

အဆိုပါ ၂၀၂၆-ခုနှစ်၊ စစ်ကိုင်းတိုင်းဒေသကြီးအစိုးရအဖွဲ့ ဝန်ကြီးချုပ်ဖလား ခရိုင် ပေါင်းစုံ အသက်(၂၅)နှစ်အောက် အမျိုးသား ဖူဆယ်ပြိုင်ပွဲကို အောက်တိုဘာလ(၂၁)ရက် နေ့မှ(၂၅)ရက်နေ့အထိ ယှဉ်ပြိုင်ကျင်းပခဲ့ပြီး တိုင်းဒေသကြီးအတွင်းရှိ ခရိုင်(၁၄) ခရိုင်မှ ပြိုင်ပွဲဝင်အားကစားသမား စုစုပေါင်း(၁၈၂)ဦး ဝင်ရောက်ယှဉ်ခဲ့ကြောင်း သိရသည်။